Shillong, Risaw 16: Ka Sorkar jylla ka la ong ba ki jingpyrshah jong ka Joint Action Committee (JAC) pyrshah ia ka Shillong Ropeway project ki dei ki kam pohiing ka Shnong bad hap shabar ka jingpeit jong ka Sorkar, haba pynskhem ba ka Sorkar kala pyndep ia baroh ki jingdonkam bad ioh lut ia baroh ki jingbit (Permission) naka bynta ka projek.
Ka Commissioner bad Secretary ka tnat Tourism Kong R M Kurbah ka la kynthoh ia kane hadien shisngi ba pyniaid ia ka jingialang bad ka JAC.
“Ka JAC ka la pynsngew ia ka jingpyrshah halor ka rukom pynlong iaka Public Hearing. Ngi la ong ia ki ba kane ka dei ka kam pohiing kaba ka Sorkar kam lah ban tuklar. Ngam lah ban ong lada ka Dorbar ka la pyntip ne em sha ki paidbah halor ka Public Hearing namar ngam don bynta bad ka Committee” ong ka Kong Kurbah.
Ka la ong ba ka tnad Tourism ka bud ia ka rukom treikam daka pyntip shaki Dorbar Shnong hashuwa ban sdang ia kano kano ka project.
“Man la ka por ba ngi pyntrei ia kano kano ka projek, ngi ju syllok shwa bad ki Dorbar Shnong namar ba la jied iaki dkhot ka Dorbar Shnong da ki paidbah nongshong shnong. Ha ka por ba ngi kwah ban pynlong ia ka Public Hearing, ngi la pynmih ia ka jingpynbna paidbah sha ka Dorbar Shnong lyngba ki Rangbah Shnong bad ngi don ia ki kot ki sla ban pyni sakhi, kiba ngi la iasam lang hynnin ka sngi” kala ong.
“Ngim lah ban leit beit sha ki paidbah. Ngi ju iasyllok shwa bad ki Dorbar Shnong, kumta ka dei ka kamram jong ka Shnong kumno kin leh ia ki paidbah naka bynta ka Public Hearing. Ngi la shim NOC na ka Dorbar” ka la bynrap.
Ka Kong Kurbah kala ong ba kane ka projek ka la don ha ka rynsan paidbah naduh u snem 2015, ryngkat ki jingthoh jong ki jingialang ha u snem 2022 bad ka jingbuh nongrim da u Myntri Rangbah ka Jylla ha u snem 2024.
“Kane kam dei ka projek kaba dang ar snem. Hangno kata kaba ki paidbah kim shym la ioh jingtip?” ka la ong.
Halor ka jingbud ryntih ia ki kyndon ain, ka la ong ba ka Sorkar ka la ioh lut ia ki kot ki sla haba iadei bad ki No Objection Certificate.
“Kino kino ki jingdonkam naka bynta ban sdang iaka project, ngi la ioh bad ngi la bud ryntih. Ngi la batai sha ka JAC halor ka DPR bad pyntip ia ki shaphang ki NOC bapher bapher ba la ioh naka tnat Forest, Airport Authority, Air Force, Indian Army, Raid Laban Dorbar Pyllun bad Ministry of Forest ka Sorkar Pdeng” kala ong.
Ka la ong ruh ba ki Engineer jong ka PHE, Municipal bad ki Environmental Engineers ki la pynshai ba ka Ropeway kan ym ktah ia ki tyllong um.
“Ka JAC kala kren halor ki tyllong um. Ngi la don ki briew na ka tnat PHE bad Municipal bad ki la pynpaw ba katei ka Project kan ym ktah ia ki tyllong um” kala ong.
Ka la ong ba ia ka DPR ba nyngkong kaba dei hajan ki tyllong um kaba don ka jingjrong kaba 25 meter, ka Sorkar kala kyntait namar ba kan donkam ban pom ia baroh ki dieng bad haka DPR kaba mynta, ka project kan dei shajngai na ki tyllong um bad ka jingjrong ka long 40 meter.
Kala ong ba ka Station ba ha khlieh duh ka don ha ka Shillong Viewpoint kaba la don lypa bad ka station kaba ar ka dei ka jaka rep symbai syntiew (Nursery) kaba ym don ki dieng, bad ka projek ka don hynriew tylli ki tower kiba heh 15×15 meter.
“Ka JAC kala pyntip ia ngi ba ka thmu ban pynlong ia ka jingiaid paidbah lashai ka sngi bad ngi la kyrpad iaka JAC ban pynthikna ba kan long kaba suk ba sain bad ban pynthikna ba kan mih kano kano ka jingjia” kala ong.
