Shillong, Risaw 16: Ki pulit ka Shillong Traffic ki la pynbna ia ki kyndon pyniaid kali kiba pyrkhing bha na ka bynta ka jingrakhe Durga Puja naduh ka 17 haduh ka 20 tarik u Risaw, kaban kut da ka jingleit pynngam ia ki blei ha ka 21 tarik u Risaw.
Ka kyrwoh ba la pyllait da u Superintendent of Police (Traffic), East Khasi Hills, Dr Hari Prasamth M R ha ka sngi Thohdieng ka la pyntip ba la buh ïa ki lad ki lynti kum ka jingkhmih lynti ïa ka jingïaid bun ki kali bad ki nongïaid ki briew ha kylleng ka nongbah ha kane ka por lehkmen.
Katkum ka jingbthah, yn pyntreikam ïa ki No Entry katkum ki sector ryngkat bad ki jaka ba la buh ban ym shah ieng kali ban pynthikna ïa ka jingïaid beit ïaid ryntih jong ki kali. Ki pulit ki la mana ruh ban pynieng bad pynsangeh ia ki kali hapoh ka jingjngai kaba 100 meter na ki puja pandal ha kylleng ka nongbah Shillong.
Ka kyrwoh ka la maham ba kano kano ka jingpynkheiñ ia ka hukum kan khring ïa ka jingpynshitom kaba tyngeh kynthup ïa ka jingai chalan, ka jingshah klam kali katkum ki kyndon aiñ.
Da kaba kyrpad ïa ka jingïatreilang jong ki paidbah, ki pulit ka Shillong Traffic ki la kyrpad ïa ki nongshong shnong bad ki nongwan jngohkai ban pule bniah ia ki jingbthah ba la pyndait ryngkat bad ka kyrwoh, ban pyrkhat lypa ïa ka leit ka wan jong ki, ban jied ïa kiwei pat ki lynti ban lait na ka jingkhapngiah bad ban pyndonkam tang ïa ki jaka ieng kali ba la aibor haba kyntu ba dei ban bud ryntih ia baroh ki jingbthah.
Na ka bynta kino kino ki jingïarap ne jingpynshai kiba ïadei bad ka leit ka wan ha ki sngi Puja, ki paidbah ki lah ban ïa kynduh ïa ki pulit pynïaid kali jong ka Shillong lyngba ki hynriew tylli ki tnad pynïaid kali kiba don ha Sadar, Laitumkhrah, Madanrting, Lumdiengjri, Rynjah, Laban bad Mawlai. Ka helpline number 112 kaba trei kam.
