Shillong, Risaw 16 : Ka Fact-Finding Committee bala thung da ka Sorkar ban tohkit halor ki kynrum kynram kiba mih na ka project Shree Cement, kala sdang ban bishar ia ki jingujor, da ka jingsdang pynlong ia ka hearing ba nyngkong eh ha Shillong ha ka sngi Thohdieng.
U Commissioner & Secretary ba khmih ia ka Tnad kam pohiing (Political) Bah Cyril VD Diengdoh, uba khlieh ia ka Committee, ula pyntip ba ka Committee kala ioh pdiang ia ki jingthoh na baroh arliang kiba kyrshan bad ba pyrshah ia ka project.
“Ka kyndon treikam jong ka Fac Finding Committee kila don ha rynsan paidbah. Ki briew kila ai ia ki jingthoh kynthup ia kiba kyrshan ia ka project Shree Cement bad katto katne kiba pynsngew ia ka jingsngewkhia. Halor kane, ngi la pynlong ia ka hearing mynta ka sngi” ong u Bah Diengdoh haba iakren bad ki nongthoh khubor.
U iathuh ba palat 15 kynhun kila wan mih hakhmat jong ka Committee.
“Palat ia ka 15 ne 16 ki kynhun kila wan mih. Ki briew kiba la wan mihkhmat ki ban sngap ia ki, kumta ngi la sngap ia ki mynta ka sngi” ula ong.
U Bah Cyril u iathuh ba ia baroh ki jingpynsngew la buh jingthoh lut. “Ngin sa bishar ia baroh kine. Ki don shibun ki jingthoh bala ai. Kat kaba ngi la dep leh hearing mynta ka sngi, baroh ngin sa buh jingthoh” ula ong.
Haba kyntait ia ka jingkynnoh ba dei ka jingbishar ka long kaba shah shiliang, u Bah Cyril ula ong ba ia ki nongtrei Sorkar ruh yn sa bthah ba kin aiti ia ki kaiphod.
“Kam don satia kata ka jingleh shiliang. Kane kam dei kaba kut. Ngin sa bishar ia baroh ki jingshisha, baroh ki kot ki sla, baroh ki kaiphod na ka Pollution Control Board, na u DC, na u SP, baroh ngin bishar lut kumba ki long” ula ong.
Ula pynshai ba ka jingbishar ka dei na ka bynta kito kiba la aiti da ka jingthoh, kynthup ki nongshong shnong bad ki sengbhalang, katto katne kila wan ban batai ia ka jingkyrshan jong ki ia ka project.
Halor ka jingdawa ba ia ka hearing dei ban pynlong ha ka jaka ban treikam ka project, ula ong “Kat kaba ki paidbah kila ong ha ka hearing, ngi la buh jingthoh bad ngin sa leh ia kaba donkam”.
Une u Khliehduh ka Committee ula pynpaw ba ka dang kloi palat ban kynthoh eiei halor ka jinglong jong kane ka kam bad ba ka sien shong bishar ban wan ka dei ka ban dang shim rai.
