Shillong, Risaw 15: U Nongïalam ka Liang Pyrshah ha Khasi Hills Autonomous District Council (KHADC) bah Titosstarwell Chyne ha ka sngi Palei u la buh jingkylli ïa ka Executive Committee ka Voice of the People Party (VPP) halor ka jingpyndonkam bunsien ïa ka bor ban weng bad sospon ïa ki khlieh nongsynshar, haba pynpaw ba ka jingshah rem man ka por ia ki mukotduma hakhmat ka Iingbishar kala pynhiar dor ia ka burom ka Council.
Haba wanrah ia ka motion ban iakren ia ka polisi jong ka EC ha kaba ia dei bad ka Elaka, u bah Chyne u la ong ba kane ka tnad ka dei kawei na kiba kongsan tam hapoh ka District Council namar la pynkupbor ia ka da ka Sixth Schedule jong ka Riti Synshar ka Ri.
“Ka tnad Elaka ka dei kawei na ki tnad ba kongsan tam hapoh ka District Council.Kum u nongmih khmat uba la don hangne ha ki por ba la leit noh, nga lah ban ong ba kane kam dei ka sobjek kaba thymmai.Ngi la ïakren na ka por sha ka por.Ka long kaba sngewkhia namar ngi hap ban peit ïa ki khlieh nongsynshar jong ngi — ki Syiem, ki Lyngdoh, ki Sordar bad ki Rangbah Shnong kiba don hapoh u pud u sam jong ka Council” ong u Bah Titos.
U la pynkynmaw ba ki seng sain pyrthei ki ju kular ban pynkhlain ia ki khlieh nongsynshar ha ka por elekshon.”Baroh ngi ong ha ka por elekshon ba ngin pynkhlain ia ki Dorbar Hima bad ki Dorbar Shnong.Haba ki Dorbar Hima bad ki Dorbar Shnong ki khlain, ka imlang sahlang ruh ka khlain.Katba kiwei pat ki jylla ki don da kiwei pat ki rukom pyniaid shnong, ngi sngew sarong ba ngi dang burom ia ki khlieh nongsynshar bad ki dorbar shnong jong ngi,” u la ong.
U Bah Titos u la kam ba don ki khlieh nongsynshar kiba teng teng ki pyndonkam bakla ia ka bor jong ki.”Ym lah ban len ba don ki por ba ki khlieh nongsynshar shnong ki pyndonkam bakla ia ka bor jong ki.Dei na kata ka daw ba ka District Council ka long ka nongsumar, ka nongri nongda, kaba peit ia ki ain.Hynrei ki don ki por kiba pynduh mynsiem haba don ki jingkhihwin ha ki Hima bad ki shnong.Teng teng ka jingbakla ka lah ban long na ka bor jong ki, na District Council ba ki pyndonkam bakla ia ka bor” u la ong.
Haba pynpaw ia ka jingthmu jong ka motion, u Bah Titos u la ong, “Ngi don ka bor ban weng, ban pynsospon, bad ban leh ia kaba donkam.Ka jingthmu ban wanrah ia kane ka jingiakren ka long katba lah, kito kiba don ha ka EC kin khanglad ia ka jingsospon, pynsangeh bad pynhiar hiar khet ia ki Syiem bad ki Rangbah Shnong”.
Haba kdew sha ka jingjia kaba dang shen, u bah Titos u la kdew ia ka base jong ka Hima Mylliem.
“Nga shu ai nuksa ia ka Hima Mylliem.Lehse ka EC ka la sospon ia u Syiem namar ba um shym la siew ia ka bhah kaba ka Council ka dei ban ioh.Lada ka EC ka la shim ia ka rai kaba dei 100 percent, balei haba ka leit ban ujor, ka rai ka pulom? Lada ka iingbishar ka pynskhem ia ka rai jong ngi ka long kaba phylla, bad kaba bha.Hynrei kaei kaba phyla ka long ba lada poi sha Iingkashari ngi shah rem”,” u la ong.
“Kane ka jingkylli ngam buh tang ia ka EC hynrei ia ngi baroh.Ngi dei ka kynhun ba la jied da ka riti synshar bad kano kano ka rai kaba ngi ai ka long katkum ka riti synshar,” u la bynrap.
U la maham ba ki jingiakhih paidbah ki ktah ia baroh ki MDC.”Haba ki paidbah ki peit sha ka District Council, kumno ngin pynthikna ba ki Hima jong ngi kin treikam beit bad im suk im sain, ba ki nongshong shnong kin ym wan sha Shillong ban pyrta bad pynrem ha KHADC?Haba ki ong ong down down KHADC, kam mut tang ia ka EC hynrei iwei pa iwei na ngi, baroh 30 ngut ki MDC,” la ong u bah Titos.
Ha ka jingmudui, u la pynpaw ia ka jingpynlut kaba pynsyrwa kai.”Ka case jong ka Hima Mylliem ka la poi sha Supreme Court, mynta pat ha Guwahati High Court.Ka jingpynlut, ka bai nongiasaid ain — hato kata kam dei ka jingpynlut kai?Lada ngim pyrkhat ba ka rai ka long kaba dei, ngim dei ban shim ia ka,” u la ong.
U la buh jingkylli ruh ia ka legal standing jong u Acting Syiems kiba ujor case. “Shisien ba la weng, shisien ba la thung Acting, u Acting uba la shah weng u mudui da ka case.Ha kano ka rukom u Acting u mudui case?Ka kam Acting ka dei tang shipor, ka dei ka hok jong ka EC ban thung Acting,” la ong u bah Chyne.
Da kaba jer kyrteng ia ki jingialeh kiba dang sahteng, u la ong, “Phi ong ba ka Hima Mylliem, ka Hima Langrin, ka Hima Sohra haduh mynta kam pat lah ban pynbeit, ngam tip kaei ka kyrdan, ka Raid Shabong, ki shnong.Ka kylla long ka kamkai ha khmat ki paidbah — uta uba jop u thmu ban shim ia ka bor, uwei pat um ai ia ka burom bad ka jingsngewsih, ka long ba sngewsih ba kala ktah ia ka burom.”
Da kaba dawa ia ka jingkitkhlieh, u Bah Titos u kwah ia ki jingtip ba bniah shaphang ki jinglut jingsep ha ka liang ka ain.”Nga kwah ban tip tang na ka bynta ka Hima Mylliem, katno la pynlut ha Supreme Court.Katno tylli ki case ba ka EC ka la sospon ne weng ia ki khlieh nongsynshar ka hukum ka la ieng, katno tylli ki la duh?Ka kylla long ka kamkai,” u la ong.
U la ai jingmut ia ka EC ban shim ia ka rukom treikam kaba biang.”Ki don kiwei pat ki lad — pyni ia ka daw, khot ban pynshai.Ngi dei ban ailad ia ki Syiem ban wanrah shwa ia ki jubab jong ki.Lada ngi sngewhun ba ka jingbakla jong ki ka long palat pud, mano ban kyrshan ia ki? Ka long kaba dei ban pynduh ia ki.Hynrei lada kam dei kata, ngi dei ban ap bad bishar bniah shwa,” la bynrap biang u Titos.
