Shillong, Risaw 15: Haba kren shai ba ym dei ban kyntur sha ki lynti iaid kjat (Foot Path), u Symbud Myntri Rangbah ba khmih iaka tnat Urban Affairs Bah Sniawbhalang Dhar u la ong ba ki nongdie jingdie madan kiba pyrshah ia ka jingpynkynriah na Jail Road kin hap ban leit shong die jingdie ha ki jaka thymmai bala ithuh kyrpang daka Sorkar.
“Ka lynti iaid kjat kam mut ba phi lah ban thiah hangta. Ka dei ka lynti iaid kjat na ka bynta ki briew ban iaid, ym na ka bynta ki briew ban shong die jingdie. Kam dei tang iaki jaka ba iaid kali” la pynskhem u Bah Sniawbhalang haba jubab ia ka jingkylli halor ka jingkynthoh ba katei ka jaka kam dei ba iaid ki kali .
U Bah Sniawbhalang ula ong ba ka Sorkar kam ailad ban shah pakhang ki lynti iaid kjat haki briew kiba shong die jingdie. “Haba dei ka surok, u briew um lah ban shong. Ngi kum ka sorkar ngi hap ban pyrkhat ia ki paidbah namar lada ngim pynkylluid kin kynnoh ia ngi,” u la ong.
Ula ong ba kane ka jingpynriah ka long ban pynlong ia ka nongbah Shillong kaba kham kylluid, kaba beit ryntih iaka jingdon ki nongdie jingdie madan bad kaba iahap ruh bad ka jingbthah ka Meghalaya High Court ba ka nongbah kadei ban long kaba khuid.
“Ngi kwah ba ka sor kan long kaba ryntih, kaba khuid bad kaba itynnad. Ka dei ban long ka jingsarong ia baroh ki nongshong shnong. Ka Meghalaya Court ka la bthah ruh ba ka sor ka dei ban long kaba khuid,” u la ong.
Da kaba mynjur ba ka jingkynriah shaki jaka thymmai kan ktah iaka iew ka hat, u Symbud Myntri Rangbah u la ong ba ka ire ka hat kan sa bha hadien habud”.
“Ngi pyrshang ban ai ia ki ia ka jaka kaba kham bha. Hooid, don ki bym kwah ban kynriah mynta. Ha kaba sdang ka lah ban ktah ia ka kamai kajih, hynrei suki suki kan sa bha,” u la ong.
U Bah Sniawbhalang ula ong ba u la pynlong jingialang bad ki nongdie jingdie madan bad ula pan ia ka jingiatreilang na ki.
“Nga la iakynduh ia ki bad nga la kyrpad ia ki ban iatreilang bad ka sorkar. Ka jingdie ka lah ban hiar ha kaba sdang, hynrei kan sa nangbha. Kim pyrshah ia ka sorkar, hynrei haba kynriah nyngkong kan don beit ka jingktah iaka iew ka hat” ula ong.
Halor ka jingdonkam ban ialap paidbah iaki iew die jingdie madan ba thymmai, u Bah Sniawbhalang u la ong ba ka Sorkar kan sa leh ia ka ba donkam kumba la leh mynshwa.
“Haba ngi pynkynriah ia ki nongdie jingdie na Khyndailad sha MUDA, nga hi nga la leit sha katei ka iew ban pyntip sha ki briew. Ngin leh kumjuh. U Myntri Rangbah ula leit sam iaka song pisa shaki nongdie jingdie madan ha Barik ban pyni ba ngi don ryngkat bad ki. Ngi kwah ba kin im ka kamai kajih, ngi kyrshan pura ia ki,” u la ong.
Haba ia dei bad ka jingai ia ki Certificate of Vending, u Symbud Myntri Rangbah u la ong ba ka jingai COV kan iai bteng.
“Kito kiba ioh COV ki la kynriah jaka. Kito ki bym pat ioh, ngi dang leh iaka ba donkam katkum ki kyndon. Ki don ki kyndon bad ki jingbthah. Ka ophis kan leh ia kaba donkam, hynrei ngin pyrshang ban iarap ia baroh katba lah,” u la ong.
