Shillong, Risaw 14 : U Chief Executive Member (CEM) ka Khasi Hills Autonomous District Council (KHADC) Bah Winston Tony Lyngdoh ula pyntip ba ka council kala dep pyndait ia saw tylli ki biometric machine ha ka jinglut ba T.4.59 lak baroh lang ban shim attendance ia ki nongtrei.
Haba jubab ia ka jingkylli u Nongialam ka Liang Pyrshah Bah Titosstarwell Chyne ha ka sngi Balang, u CEM ula pyntip ba ka Executive Committee kala pyntreikam ia ka Biometric Attendance System (BAS) na ka bynta baroh ki Ophisar bad ki Nongtrei, kaba la treikam naduh ka 1 tarik Nailur, 2026.
“Ia kane ka BAS la pyntreikam ban pynthikna ia ka a ka jingpoi trei ha ka por kaba biang, ban pynneh ïa ka jinglong ryntih bad ban kyntiew ïa ka jingkitkhlieh,” ong u CEM.
U iathuh ba ka EC kala mynjur ia ka quotation ba T.3,59,829 ban pyndait ia kine ki machine, bad ka jinglut baroh lang ka long T.4,59,854 na ka bynta ki 4 tylli ki machine.
Haba kren halor ki briew kiba hap hapoh ka jingpyntreikam jong ka BAS, u CEM u la ong ba la buh shabar ka BAS ïa ki ophisar ka ïingbishar bad ki MDC kaba long katkum ki hukum jong ka Supreme Court.
“Ngi la pynlait noh ïa ki ophisar ka ïingbishar kiba don hapoh ka Judiciary Wing bad ïa ki dkhot kiba la shah jied da ki paidbah. La leh ïa kane katkum ki hukum bapher bapher kiba la pynmih da ka Supreme Court jong ka India,” u la ong, haba bynrap ba u donkam ia ka notice ban ai ïa ki jingtip ba thikna ia ka jingdon ki nongtrei kiba pyndonkam ïa ka BAS.
Haba jubab ia ka jingkylli la yn pyntreikam ïa ka BAS ha ki ophis ha Nongpoh, Mawkyrwat bad Nongstoin, u CEM u la ong, “Ngi la sdang pyntreikam ïa kane dang ha u bnai Nailur, bad ban pyndonkam ïa ka BAS donkam ïa ka jingpynïasoh internet, ka jaka ban buh ïa ki kor bad ka jinglong ban pyntreikam ia ka. “Ngi don ka jingthmu ban pyniar ïa kane ka rukom treikam sha ki ophis tnat, hynrei nyngkong eh ngi hap ban pynthikna ba ka jingpynïasoh internet kan long kaba biang. Ha ki bnai bad ki snem ban wan, ngin sa pyrshang ban bishar ïa kane ka jingai jingmut.”
