Shillong, Risaw 13 : Ka jingkhynra ba kynsan kynsan jong ka Jaintia National Council (JNC) haka sngi Ba-ar kala lam sha ka jingkhang dam ia katto katne tylli ki dukan jong ki bar jylla ha Khliehriat West kiba treikam khlem ki licence kiba treikam.
Ia ka jingkhynra la leh da ka Central Executive Committee (CEC) ka JNC ha ka jingdonlang ki nongtrei ka JHADC, hapoh ki kyndon ka JHADC Trading by Non-Tribals Rules, 2015.
U General Secretary ka JNC Bah Wanshwa Suting ula ong ba ia kane ka jingkhynra la pynlong hadien ba ka Council kala shem ba don bun ki bar jylla kiba pyniaid ia ki kam khaii ha East Jaintia Hills District.
“Ka jingthmu ba hakhmat hi ka long ban pynshisha la kine ki dukan ki don ne em ia ki licence bad ki kot ki sla kiba kyrshan ia ka” ong u Bah Suting haba iakren bad ki nongthoh khubor.
Ula ong ba ka jingbym don ki licence ka ktah beit beit sha ka jingduh khajna jong ka Autonomous Council. “Ka jingbym don ki licence bad ki kot ki sla ka dei kawei na ki daw ka jingduh khajna bad pisa ka GHADC” ula ong.
Ha kane ka jingkhynra, katto katne tylli ki dukan la shem ba kim don ia ki Trading Licence bad ki kot ki slab a donkam bad don ruh kiba treikam beain khlem ki kot ki sla.
Ula ong ba kane ka jingplie dukan khlem da ioh bor kala ktah ia ki trai shnong khamtam haba ia ki kam khaii kaba ki trai shnong ki lah ban leh, lah knieh noh da ki bar jylla.
Hadien ka jingkhynra, ka JNC kala hukum ban khangdam ia ki dukan kiba pynkhein ain bad maham tyngeh ia ki. Ki nongtrei ka JHADC ruh kila maham ban leh da kaba tyngeh lada shem biang ia ka jingkhaii beain.
Ia kito kiba don ka Trading Licence hynrei ki bym don ia ki service document, la aipor shitaiew ba kin pynbiang lut ia ki, ong u Bah Suting haba bynrap ba ka jingbym bud ia kane ka jingbthah kan khring ia ka jingleh da kaba tyngeh na ka Council.
