Shillong, Risaw 13 : Ka jinglong skul ha ki skul deficit kan shah ktah jur ha kylleng ka Jylla naba ki nonghikai bad ki nongtrei kin sdang ia ka jingiashim shuti paidbah naduh ka 13 tarik Risaw haduh ka 15 tarik Risaw, 2026.
Ka Khasi Jaintia Deficit School Teachers’ Association (KJDSTA) bad Garo Hills Deficit School Teachers and Employees Association (GHDSTEA) kila pyntip ba kin pyniaid shakhmat bad ka jingiakhih hadien ba ka jubab jong ka Sorkar ia ki mat jingdawa ka pyni ia ka jingbym shimkhia.
U President ka KJDSTA Bah Boswell Pala ula ong ba ka jubab ka Sorkar ha ka 8 tarik Risaw na u Joint Secretary ka Tnad Education D Lyngdoh kam shym la kren eiei halor ka dorkhas ba 25 tarik Nailur bala aiti sha u Myntri Rangbah Conrad K Sangma.
Ki jingdawa ba hakhmat eh ki kynthup ia ka jingpynduhnoh ia ka skhim 2026 bad thung biang ia ka Board of Trustees (BOT).
Ha ka jaka ban pynduh ia ka skhim, ka shithi kala bthah ia ki nonghikai ban register na ka bynta ka PRAN ban pyntreikam ia ka skhim 2026, ong u Bah Pala.
Halor ka BOT, ula ong ba ka Sorkar kala tyrwa ban kynthup ia ki nonghikai deficit ha ka board bala thung ha ka 27 tarik Iaiong, 2026, ia kaba ka association kala kyntait.
“Ka shithi kam shym la jubab ia ki mat jong ki jingdawa. Ki don ki mat ia kaba la jied ban shu sngap jar” ong u Bah Pala.
Ula ong ba ki artylli ki association ki shim ia ka jubab ka Sorkar kum ka bym lah ban pdiang bad kila rai ban pyniaid shakhmat bad ki jingiakhih haba pynpaw ba ki association ki long kiba kloi ban iakren.
