Nongstoin, Risaw 12: Ki Pulit ka West Khasi Hills kila maham ban leh da kaba tyngeh ia kiba pynkhriang ia ki durkhih (video) jong ka jingjia ba jia ha ka thain Mawshynrut, kaba hap hapoh ka kyndon POCSO bad IT.
Ki Pulit kila register ia ka case halor ka jingpynsaphriang ia kine ki video kiba la mih ha kine ki khyndiat sngi ha ki social media hapoh ka Mawshynrut Police Station Case No. 19(10)2026 bad la pynngat hapoh ka kyndon 64(2) (m)/351(3) BNS R/w Section 5(1)/6/15 POCSO Act pule lang bad ka kyndon 67 B IT Act.
Ki Pulit ki kyntu ia baroh ba kim dei ban pynphriang ia kum kine ki video bad ba dei ruh ban pynduh mar mar ia kiba lah dep pynphriang namar kane ka kam ka long pyrshah ia ki kyndon ka Bharatiya Nyaya Sanhita bad Information Technology Act bad kiba pynsaphriang khlem artatien kin shah kem.
Ki ong ruh ba lada la pynsaphriang lane pynpaw noh ia ka kyrteng lane ka dur khih jong ka nongshah leh kam sniew, kiba pynsaphriang kin ngat ha ka jingpynsaja.
Ki Pulit ki kyntu ba lada don mano mano kiba don jingtip halor katei ka jingjia, kin sngewbha ban ai jingtip mar mar sha ka Police Control Room (Ph. No- 9366498499) lane phone ha u 112. Ia kiba ai jingtip yn buhrieh kyrteng.
Sa shisien, na ka liang ki pulit ka West Khasi Hills Police ka kyntu sha baroh ban ym pynsaphriang klumar ia ki dur khih kiba long pyrshah ia ka ain. Kino kino kiba ialeh pyrshah hap ban shim ki sien jam katkum ki lynti jong ka ain.
