Shillong, Risaw 12 : Ka Shillong Sports Association’s Super Cup 2026 kan sdang lashai ka sngi Hatmajai daka jingiakhun playoffs kaba nyngkong hapdeng ka Nongkseh SSCC pyrshah ia ka Sawmer SC ha ka por 2:45 nohphai sngi.
Ka jingpynlong ia kane kawei pat ka lympung ialehkai, ka long hadien ka jinglah ban pynkut noh shwa ia ka shi wat ialehkai jong ka lympung Shillong Premier League 2026, ha ka sngi Saitjain ka taiew kaba la dep, ha kaba ki khmat pat mynta kin ia phai sha kane ka jingiakhun ka Super Cup, kaba la sdang ban pynialehkai naduh u snem bala lah.
Tang ki klob ba kynjoh sha ka kyrdan Top 6 ka SPL, kila ioh ban iakhun ha kane ka lympung. Ka Mawlai SC bad ka Shillong Lajong FC, kiba long ka Champion bad Runners Up ka SPL-2026, kila jam lypa sha ka semifinal.
Ka Nongkseh SSCC bad ka Sawmer SC kin iakhun ia ka playoffs ba nyngkong lashai ka sngi, bud pat sa ka kynhun ialehkai ka Langsning FC bad ka MLP FT.
Ha ka samoi ialehkai ba la dep, ka nam lahduh na kane ka lympung dei ka Shillong Lajong FC hadien ba ka la lah ba kan pynliem ia ka Rangdajied United FC, kaba mynta ka samoi kam shim la lah ban ioh rung sha kane ka kyrdan iakhun.
Ka jingiakhun kaba kum kane, ka juh wanllam pat ia ka khubor lam pongpet bad kum ka nuksa ha ka samoi ialehkai u snem ba la dep, ka Rangdajied kaba la lah ba kan ioh bat ia ka kyrdan kaba san ha ka SPL 2025 ka la iai bteng ba kan jam shakhmat tad haduh ba kan da rung sha ka phainal.
Namar ha ki lympung iakhun knockout, ka donkam ia katta ka dur ka dar bad ka rukom pyrkhat ialehkai da kumwei na ki player, namar haba mih madan, kaei kaba donkam ka long beit ia ka jingjop ne ha man la ka jingiakhun dei ban mih beit ka resol mano ba rem ne mano ban jop.
Lada jia ba ka 90 minit ka kut ha ka jingiakhaid, hap ban rah ia ka sha ka extra time bad lada dang donkam hap ruh ban bteng pat ia ka shaduh ka tie breaker, kaba mut ba ki ktang lyer jong man la ki player ba iakhun ha madan, kin hap ban long kiba dap bad ba biang pura bha, kaba dei lyngba jong kane, kaba wanrah ia katta ka jingmuja, itynnad bad ba iakhaid bha naka bynta u paidbah nongwan peitkai.
