Shillong, Risaw 12 : Ka Sorkar Jylla kala pynkynriah ia ka jingshong bishar halor ki jingjia kiba mih na ka public hearing ka kompani Shree Cement ha East Jaintia Hills sha ka 16 tarik Risaw, haba rah ruh ia ka jaka na Khliehriat sha Secretariat ha Shillong.
Ia kane ka jingshong bishar yn pynlong ha ka por 10 baje mynstep hapoh ka Committee Room IV jong ka Meghalaya Civil Secretariat Main Building, ong ka public notice bala pynmih da ka tnad kam Pohiing (Political).
Kane ka jingshong bishar ka dei kaba la buh ban long ha ka 13 tarik Risaw ha Circuit House, ha Khliehriat.
Ka Fact-Finding Committee, bala thung da ka Sorkar Jylla ban shong bishar ia ka jingujor pyrshah ia ka project Shree Cement bad ki jingjia kiba mih na ka public hearing.
Ka Committee kala bthah ia baroh kiba phah ia ki jingthoh ba kin wan mih ha kane ka sngi bala pynbeit thymmai. La bthah ruh ba kin wanrah lang ia ki kot ki sla kiba dei ki original.
