Shillong, Risaw 9: Ka North Eastern Electric Power Corporation Limited (NEEPCO) ha ka sngi Thohdieng kala ong, ba kala ioh ia ka jingiohnong kaba bun eh hadien ka jingsiew khajna kaba long T.769.08 Klur ha u 2025-26 kaba long jan shibynta na ka lai bynta na ka jingpynmih bording na ki project hapoh ka thain Shatei Lam Mihngi.
Ka Corporation kala sam jingtip ia ka jingtreikam jong ka ha ka jingialang kaba man la ka bnai jong ka Inter-Media Publicity Coordination Committee (IMPCC) ha u bnai Risaw 2026, kaba la long ha NEEPCO, Shillong.
Haba pdiang ia ki nongiashimbynta, u Samiran Sinha Ray, Chief Human Resources Officer (CHRO), NEEPCO, ula batai ia ka rukom treikam jong ka Corporation, ki jingseisoh kiba khraw bad ki sienjam kiba dang iaid shakhmat. La ai ruh ka jingbatai ha kaba iadei bad ki project pynmih bording, ka jingpyndonkam ia ka pisa pilain, u mawmer ha ka jingtreikam, ki projek kiban dang leh bad ka jingnoh synniang ia ka thain.
Katkum ka jingai jingbatai, ka NEEPCO kala kynjoh ia ka jinglah ban pynmih ia ka bording kaba long 2,051 MW ha ka thain shatei lammihngi, kaba kynthup ia ka 1,519 MW hydropower, 527 MW kaba pyniaid da ka Gas, 5 MW lyngba ka Solar. Katkum ka National Power Portal data, kane ka long kumba 32.6 percent jong ka thain ha ka jinglah ban pynmih ia ka bording kaba kot 6,298 MW.
Ha kane ka jingpyni, la ai jingbatai bniah ruh ia ki steshon kiba heh kiba kynthup ia ka 600 MW Kameng Hydroelectric Power Station ha Arunachal Pradesh kaba la pyntreikam ha u snem 2020-21.
Ka NEEPCO kala ong, ba ka dang iaid shakhamt bad kiwei pat ki projek kiba heh kynthup ia ka 240 MW Heo, 186 MW Tato-I bad 700 MW Tato-II hydro project ha Arunachal Pradesh. Ha ka Renewable Energy, ruh ka dang iaid shakhmat bad ka 300 MW Ground-Mounted Solar Photovoltaic Project ha Bikaner, Rajasthan.
Kine ki sienjam kidei kiba lah khmih lynti ban pynmih bun bad ban kyrshan ia ka ri India ha kaban pynmih ia ka bording kaba khuid, la ong ka Corporation.
Ka CSR bad ki kam pynroi ha ka imlang sahlang kiba kala shim ki pynleit jingmut halor ka pule puthi, ka koit ka khiah, ka jinglehkhuid lehsuba, ki jingai jinghikai ban pyntbit ia ki sap ki phong bad ka jingkyrshan ia kito kiba wan na ki longiing kiba duna ha ka ioh ka kot.
Kum shi bynta jongka Swachhata Hi Seva Campaign, ka NEEPCO kala shim ne ‘Adopt’ ia ka MUDA Shopping Complex ha Khyndailad, Police Bazar, Shillong, kum ka Cleanliness Target Unit (CTU) bad kala shimkhia ban pynkhuid man la ka sngi, ban pynkhuid ia ki jingbiah kwai bad ka jingtah shun bad ka jingbret pathar ia ki jaboh jabain ban kyntiew ia ka khuid ka suba.
Ka IMPCC, kaba la seng da ka Ministry of Information and Broadcasting ha ka Regional Level, ka plie lad ban sam ia ki jingtip hapdeng ki tnad sorkar, ki PSU bad ki lad pathai.
Ka jingialang kala khmih bniah ruh ia ki kam kiba la pynsaphriang ia ki khubor sha ki paitbah ha ki bnai kiba la dep bad lah iakren ruh ia ki Media Plans na ka bynta ki bnai kiban wan ban sam ia ki jingtip shaphang ki prokram sorkar bad ki jingseisoh ki kam jong ki tnad bapher.
Ki nongmihkhmat na ka NEEPCO, NEHU, Soil and Water Conservation Department, Power Grid, Census Authorities, Akashvani Programme Section, ICAR Umiam, Doordarshan Kendra Meghalaya, IMD Shillong, NEIAH, NECTAR, PIB bad CBC kila wan ban iashimbynta ha kane ka jingialang.
