Shillong, Risaw 09 : U President ka NPP-Meghalaya bad Symbud Myntri Rangbah ka Jylla Bah Prestone Tynsong ula ong ba tang ka NPP kaba dei ka National party kaba mih na ka thain Shatei Lam Mihngi bad ai burom ia ka da ka jinglah ban pynlait ia ka Meghalaya na ka Citizenship Amendment Act (CAA) bad ban tuklar lang halor ka amendment ka FCRA.
Haba kren ha ka jingialap elekshon ha Mylliem na ka bynta u kyrtong Dr DRL Nonglait u ban aireng ha ka elekshon shiteng samoi ka Shillong Lok Sabha, u Bah Prestone ula onng ba ka jingioh kyrdan national party ka NPP kala wanrah ia ka jingithuh bad ki jingmyntoi ba shisha sha ka Jylla.
“Pyrkhat bha ia ka, na ki 8 tylli ki Jylla ka thain Shatei Lam Mihngi, tang ka NPP ka dei ka National Party, wat ka Assam kam don kawei ruh ka National Party. Haba ngi ong National Party ka mut ba ka Election Commission kala khein na baroh ki liang ia kiei ki party kiba dei hok ban ithuh kum ki National Party” ong u Bah Prestone.
“Ka dei ka jingieid ba kyrpang u Blei ia ka Meghalaya. Ha u snem 2019, ka ECI kala pyntip ia u President jong ngi Conrad K Sangma ba ka NPP kala dei hok ban shah khot kum ka National Party” ula ong.
Haba kdew ia ki jingmyntoi, u Bah Prestone ula kdew sha ka Ophis ka Party ha North Avenue ha New Delhi. “Ka Sorkar India ka hap ban ai ia ka Ophis ha Delhi. Mynta ka NPP ha Delhi ka don ia ka Ophis ryngkat ka dur u PA Sangma, Conrad K Sangma bad ma Nga.
Hapoh ka NE, hati ka don kano kano ka party kaba mih na kine ki Jylla ka ban don ia ka Ophis ha Delhi? Ym don kawei ruh?” ula ong.
“Ka Meghalaya ka dei kaba rit lada khein ha ka jingdon briew, hynrei ka Nongbah Delhi ka tip ia ka Jylla. Ha u 2019 haba phaidien, ym ju don ba iakren halor ka Meghalaya. Hynrei naduh u 2019, tang mar syn ong Meghalaya, ki kynmaw ia ka North Avenue ha Delhi” ula ong.
Haba pynkynmaw ia ka jingiakhih pyrshah CAA ha u 2019, u Bah Prestone ula ong “Ngi kynmaw ia kaei kaba jia ha u 2019 ha ka por ka CAB, kala long kumba pluh ha NE. U Conrad K Sangma ula ialam ia ka kynhun ki seng sain pyrthei na NE bad ki sengbhalang na Meghalaya ban iakynduh ia u Amit Shah. Ngi ong ba ka Meghalaya ka hap ban treikam kat kum ka Sixth Schedule. Kala rung ha ka jabieng u Amit Shah. Hadien shitaiew, ula pyntip sha u Conrad bad ong “Ka dei kaba shisha, ka Sixth Schedule kala treikam pura ha Meghalaya lait noh ki katto katne ki jaka bala tip kum ka European Ward, na kata ka daw ka CAA kan ym treikam satia”.
“Pyrkhat bha ia ka, baroh kiwei ki Jylla ki pyntreikam ia ka, hynrei ha Meghalaya ym shym la pyntrei, kito ki dei ki dak kiba kaei ka party kala leh” ula ong.
Halor ka Foreign Contribution Regulation Act (FCRA), u Bah Prestone ula ong “Mynta ka don sa kawei ka ishu kaba baroh ha ka thain Shatei Lam Mihngi ki sheptieng-ka amendment jong ka FCRA. Lyngba ka NPP, lyngba u National President jong ngi uba dei ruh u Myntri Rangbah Conrad K Sangma, ula ialam ia bun ki seng niam ban iakynduh ia ki nongialam ha Delhi. Namar kane, ia ka Amendment Bill la phah sha ka JPC ba kan shong bishar biang”.
“Na ka thain Shatei Lam Mihngi ym don uwei ruh u dkhot ha ka JPC. U Conrad ula leit iakynduh biang ia u Speaker bad haba kut, u Speaker ula thung ia u James PK Sangma. Hato kane kam dei ka burom?” ula ong.
U Bah Prestone ula ther ruh ia ki nongkynthoh pyrshah kiba pynman ia ka NPP kum ka nongwei lane ka party Garo.
“Nga kwah ban kylli, kiei ki kyntien ki ba kim pat pyndonkam ban kawang maw ia ka NPP? Ba ka NPP ka dei ka party dkhar, ka party Garo, ka NP ka dei ka party ka bym long ban iakren. Phi lah ban kawang maw kat kaba phi mon, hynrei ha kawei ka sngi phin sa ong ba ngi donkam ia ka jingkyrshan jong ka NPP” ula ong.
Ula kyrpad ia ki nongthep vote ba kin kyrshan ia u Dr Nonglait bad ong “To ngin iatreilang, ai ka jingkyrshan ba pura ia u Dr Nonglait, khnang ba un long u MP jpng ngi bad ba un shong ruh ha ka jaka kaba ngi la buh ia ka Ophis, khnang ba ki paidbah na Meghalaya kin sngew shngain bad ih mynsiem haba ki iohi ia ki dur jong ki nongialam ba khraw na ka Jylla kaba rit kum ka Meghalaya”.
