Shillong, Risaw 09: U Nongialam ka Liang Pyrshah u Dr Mukul Sangma ha ka sngi Palei ula ong, ba ka jingkynnoh lum pisa ki pulit ha ki Check Gate kiba be-aiñ kam lah ban jia khlem da don kiba pynshlur bad ula dawa ba dei ban leh da kaba tyngeh katkum ka Meghalaya Police Act, 2010.
“Ka Police Act 2010 ka ai bor ban leh da kaba tyngeh mardor pyrshah ia kino kino ki ophisar kiba pyndonkam bakla ia ka bor. Lada uno uno u ophisar pulit u lah ban leh ia kaei kaei ha la ka jong ka mon, kumta kam lah ban long satia lada kam dei ba ioh ia ka jingpynshlur nano re nano” la ong u Sangma.
Ula ong ba ia kum kitei ki jingkynnoh donkam ban leh da kaba tyngeh bad ban phah tohkit da kaba laitluid.
“Kitei ki jingkynnoh ka donkam ban leh da kaba tyngeh bha kaba lait na kano kano ka jingtuklar da ka kam sain pyrthei. Hato kan jia lada ka sorkar ka dang iai kyntait kaba ju long ruh barabor?” ula buh jingkylli.
U Mukul Sangma ula iaroh ia ka Khasi Students Union (KSU) halor ka jingleit khynra kaba dang shen bad ong, ba kane ka jingleh ban peitngor da ka imlang sahlang kala pynlong barabor ia ka Meghalaya ban long kaba husiar.
Ula dawa ba ka jingialang jongka State Security Commission kadei ban iakren halor kane ka jingiasylla.
“Nga lah dep shimet nalade ban pasiaw ha u Myntri Ragbah ban lum ia ka jingialang jongka State Security Commission. Ka sorkar kadei ban lum ia kane ka jingialang shisien ha ka 3 bnai. Lah katno sien ngi lah pynlong ia ka jingialang? Kam dei ka kamram ka jong nga ban iai pynkynmaw ia ki” ula ong.
U Sangma ula ong, ba ka sorkar ka jongu ha u snem 2010 kala pynmih ia ka hukum ne ka Executive Order ha kaba la khang pyrshah (ban) ia ki Check Gate kiba be-aiñ ia ki trok bad dei ban phah bahkhlieh ia ki DC bad SP.
“Katei ka hukum ka dang treikam haduh mynta. Kum u Symbud Myntri Rangbah u Bah Prestone ula ong, ba ka hukum ka dang ieng. Hynrei katei ka hukum kan ym don dor pat lada ym pyntreikam satia ia ka” ula ong.
Ula ong, ba ka jingpynkynriah kam laitlan ka pynkhein ia ka Police Act bad ka iapein noh ia ka jinglong jingman.
“Ki pulit kidei shi bynta jong ka jingsynshar khaddar ban ai ia ka hok. Kano kano ka jingiapeiñ ia katei ka bynta kan don ka jingktah kaba jur bha. Kim lah ban leh hala ka mon ban thung ne pynkynriah kam” ula ong.
Halor ka jingdawa ban weng kam shipor ia u SP bad u DC, u Sangma ula ong, “Ka Section 107 bad 108 jongka Police Act dei ban pyntreikam bad dei ruh ban rekod ia ka jingkren ne jingpynpaw khnang ba ka jingtohkit kan long kaba khuid bad kaba laitluid ban tip ia ki bor kiba don na sha lyndet”.
“Kumno kan urlong haba ki bor kiba dei khmih kin ym tip eiei? Hato kidei kiba kyllut ne matlah? Kam dei kaba la jia tang ha kawei ka surok, kadei kaba lah iakren ha kylleng ki shnong” ula bynrap.
