Shillong, Risaw 09 :Ka Iingkashari Meghalaya High Court ha ka sngi Palei kala niew kum ka kam beain ia ka jingpep leit pyndep ia ki kam kashari da ka Shillong Bar Association bad ka High Court Bar Association namar ka jingdawa weng ia u Advocate General bad kala pynngat da ka mukotduma suo motu criminal contempt pyrshah ia ki nongkitkam jong kine ki Association.
Ka Division Bench jong ka Chief Justice Revati Mohite Dere bad Justice HS Thangkhiew kila register ia ka PIL No.21/2026 hadien shimkhia ia ka rai jong kine ki Association ba 30 tarik Nailur, 2026, kaba khot ia ka jingpep leit iingkashari naduh ka 1 tarik Risaw ha baroh ki district tad haduh ba ka Sorkar ka weng ia u Advocate General.
“U Registry ula wanrah hakhmat jong ngi ia ki jingkhein na baroh ki district, kynthup ka High Court. Ka jingkhein ka pyni ba ka jingpep leit iingkashari kala ktah ia ka jingai ia ka jingbishar ba hok. Ka jingpep ha High Court bad baroh ki district lait noh ka Baghmara kala pynlong ia ki nongiakhun mukotduma ban nym don ki nongiasaid” ong ka Iingkashari.
Ka Iingkashari kala iaroh ia ka Baghmara Bar Association namar ka jingkyntait ban iasnohkti lang ha katei ka rai, haba pynpaw ba kan long kaba iaid pyrshah ia ka hukum ka Supreme Court ha ka mukotduma Ex. Capt Harish Uppal v.Union of India (2003) 2 SCC 45.
Haba pynmih ia ka notice hapoh ka kyndon 15 jong ka Contempt Act pule lang bad ka Article 215, ka Iingkashari kala bthah ban show cause ia 21 ngut ki nongkitkam jong ki Bar Association ba balei ym dei ban tian bishar criminal contempt ne ialeh pyrshah ia ka bor ka Iingkashari pyrshah ia ki.
Ia ka notice la phah sha u President ka High Court Bar Association K.S. Kynjing, Sr. Adv, Vice Presidents N. Syngkon and Pyllang Nongbri, Secretary General Kishore Ch. Gautam, Secretaries Andrew R. Passah and Arnold G. Momin, Treasurer Sujit Dey bad 8 ngut ki executive members — Apu Dey, Andrew M. Sangma, Cherak C.T. Sangma, Jonathan M. Thangkhiew, H.L. Shangreiso Sr. Adv, Melvbin M. Laitmon, Raymond K. Majaw, Rosylia Kharshiing.
Na ka Shillong Bar Association, ia ka notice la phah sha u President H.R. Nath, Vice President Nelson Kharnarbi, Secretary Teiborlang Jyrwa, Assistant Secretaries N. Shyambor Singh Marpan and Nurina N. Lyngdoh, Treasurer Ilawanda S. Lyngdoh bad ki executive members Kishore Ch. Gautam, Ricky Nelson Marbaniang, Jonathan M. Dkhar, Jyoti K. Marak, Krishna Sharma bad Stevie R. Lyngdoh.
La bthah ia baroh 21 ngut ba kin wan mih dalade hakhmat ka Iingkashari ha ka sien shong bishar ban wan, kata ha ka 13 tarik Risaw, 2026.
Ka Iingkashari kala maham ba lada kim sdang treikam noh ha baroh ki district, kan sa ai lang ia ki notice contempt pyrshah ia ki President, Secretary bad ki nongkitkam jong ki District Bar Associations, lait noh ka Baghmara.
Kala pynlong mamla ruh ia ka Bar Council of India kum ka liang mamla ba 5 bad phah notice sha ka State Bar Council of Meghalaya bad CBI, haba khmih lynti ba u Chairman ka State Bar Council un wan mih dalade ha ka sien shong bishar ban wan ba un pyntip ia ki sienjam bala shim pyrshah ia ki nongiasaid ain kiba iakhih.
