Shillong, Risaw 09: Ka National People’s Party (NPP) ka la nang suhthied shuh shuh ha South Shillong da ka jingwan iasoh haduh 44 ngut ki riew pawkhmat bad ki nongialam shnong sha ka party.
Ia kine ki dkhot thymmai la pynrung hadien ka jingialang ba kyrpang ba la khot ha ka 12 tarik u Nailar ban pyniar ia ka jingdon jong ka Party haki shnong jong ka South Shillong.
Ha ka dorkhas ba la aiti ha ka 16 tarik Nailar sha u President ka Shillong City NPP Unit, u General Secretary u Mehankmen Kharkongor u la pan jingmynjur ba pura na ka bynta ban pynrung ia ki 44 ngut ki dkhot ryngkat bad ka Executive Committee ba dang shu jied thymmai na ka bynta katei ka Constituency.
Haba shim ia kane ka jingrung ki 44 ngut kum ka jingkyrkhu ia ka Party, ki nongialam ka NPP ki la ong ba ka jingwan ki paidbah ka pyni ia ka jingshaniah kala nang kiew ha ka jingsynshar jong ka Party.
“Ka jingiai wan jong ki nongshong shnong kiba wan rung sha ka NPP ka pyni ba ki briew ki ïahap bad ka jingthmu jong ngi na ka bynta ka Meghalaya. Kane kan ai bor iaka NPP bad kan nang kham khlaiñ ha South Shillong,” la ong uwei u nongtrei ka party.
