Shillong, Risaw 08 : Kum ka jingpynbeit thymmai hashuwa jong ka elekshon Garo Hills Autonomous District Council (GHADC) kaba la pynjlan biang sa hynriew bnai, ka National People’s Party (NPP) kala pyndam noh shuwa ia ka thup ki 29 ngut ki kyrtong bala pynbna haba sdang une u snem.
U President ka NPP Meghalaya Bah Prestone Tynsong ula pynbna ban pynsangeh ia ki artylli ki thup bala pynmih ha ka 16 tarik Rymphang bad 4 tarik Lber, haba shimkhia ia ka jingtyrwa bala wanrah da u Working President ka Party ba khmih ia ka ri-lum Garo Marcuise N Marak.
Ha ka hukum, u Bah Prestone ula ong “Ka jingpynbna….kan sangeh treikam noh mardor. Kane ka long kaba donkam namar ka jingpynbeit thymmai ia ki 29 tylli ki constituency ka GHADC”.
Kane ka sienjam ka dei kaba la mih ruh na ka jingialang ki Heh Nongialam ba long ha u Nailar hapoh ka Iingsah jong u Myntri Rangbah Conrad K Sangma.
Kat kum ka shithi u Marak ba 6 tarik Risaw, ia ka jingialang la pyniaid da u Myntri Rangbah dalade ha ka jingiadonlang u Lamphang ka Iingdorbar Thomas A Sangma bad kiwei ki nongialam bala rangbah jong ka party.
“La shim ia ka rai, namar ka jingdon ka jingpynbeit thymmai ia ki constituency ka GHADC, ka kyrteng jong ki kyrtong bala jied hashuwa bad pynbna da ka party yn pyndam noh bad ia ki kyrteng ba thymmai yn sa shong pyrkhat kat kum ki constituency ba thymmai” ong u Marak ha ka shithi ba tyrwa ban pyndam noh ia ka jingpynbna.
Ka thup ba hashuwa ka kynthup ia baroh 29 constituency. Ka party kala pynbna 24 tylli ki kyrteng ha ka thup ba nyngkong bad san tylli ha ka thup kaba ar.
Da ka jingpynbeit thymmai ia u pud u sam jong ki constituency ka Council, ki nongialam kila rai ban sdang thymmai biang ia ka kam ban jied kyrtong.
U Marak ula kular ba ia ki kyrteng ba thymmai yn sa aiti sha u President ka Jyla ban ioh jingmynjur shen.
