Shillong, Risaw 07 : Ka jingiakhih ki nongiasaid ain pyrshah ia u Advocate General Amit Kumar kala kylla mynta sha ka jingiakhih halor ka jingkhuid ka jingtreikam (transparency), ha kaba ka High Court Bar Association kala kynnoh ba ka Sorkar Jylla kala khnang ban ai jingtip ia ka pisa u paidbah bala pynlut ha ka Ophis u AG.
U Secretary General Kishore Gautam ula ong ba ka jingpan RTI ia ki jingpynlut ba bniah la kyntait ha ka sngi ba 30 da kaba kdew ia ka kyndon 8.
“Ngi la pan RTI ban tip haduh katno ka pisa paidbah la pynlut na ka bynta ka Ophis jong u Advocate General bad ki nongiasaid ain ba nabar Jylla. Ha ka sngi ba 30, kila jubab da kaba ong ba kim lah ban ai ia ki jingtip hapoh ka kyndon 8, kaba ym lah satia ban pynskhem kat kum ka ain” ong u Gautam.
“Ngi la phah ia ka jingkyrpad (appeal). Kala shai ba ka Sorkar ka pyrshang ban buhrieh ia ki jingtip. Kam kwah ba ka pisa bala pynlut ia u AG bad ka Ophis jong u kan mih paidbah, namar ki paidbah kin sa sngewthuh balei ba ngi iakhih” ula ong.
U Gautam ula ong ba ka pisa ka iaid da ki klur, kaba bun bun shah ban ia kiwei ki AG bala leit noh.
“Shibun bah ka pisa, da ki klur, la pynlong ban pyniaid ia ka Ophis jong u Advocate General uba wan na Delhi. Haba nujor bad ki Advocate General barim phin sa iohi ia ka jingiapher kaba heh bha” ula ong.
“Kum ka Jylla kaba rit jong ngi, ngim donkam ban pynlut bun na ka bynta u AG bad ki nongiasaid ain kiba wan na shabar ka Jylla bad sah ha ki five-star hotel” bynrap u Gautam.
Ula pnpaw ba ka Bar kan nym sangeh satia tang ha kane ka jingkyrpad ba nyngkong.
“Ia kane ka jingtip la kyntait ban ai sha ngi. Ngi la phah ia ka jingkyrmen kaba nga sngew ba kin sa kyntait ia ka ruh, hynrei ngin dang iai buddien beit. Kim lah ban pyntreikam ia ka kyndon 8 haba don bynta ka pisa u paidbah” ula ong.
Halor ka jingthung ia u Kumar kum u nongiasaid ain ba rangbah, u Gautam ula ong “Um dei satia u nongiasaid ain ba rangbah ha ka por ba u wan shane. La thung ia u na kane ka jaka. Ngi la khot ia ka jingialang jong ka General Body ha katei ka por bad kwat ban tynjuh ia kane ka jingai kyrdan, hynrei ym shym la lah ban pynlong”.
“Mynta uwei u briew ula bat lut ia kiei kiei baroh ha ka jingpyniaid jong u. Ngi la shah pynbor ban nym leit sha Iingkashari namar uwei u briew. Ki paidbah kila mad ia ka jingeh, ki nongiasaid ain kila mad ia ka jingeh bad ka Sorkar kala sngap jar. Kane ka pyni ia ka rukom long ka jingpyniaid kam ha Jylla” ula ong.
