Shillong, Risaw 7: U Myntri Rangbah ka Jylla u Conrad K Sangma ha ka sngi Baar ula ong, ba ka sorkar kan iai bteng ban iakren bad ka Khasi Students’ Union (KSU) bad kam don kano kano ka jingiakynad, wat hapdeng ki jingjia jong ka jingthombor da ka jingkawang petrol bomb ia ki ophis sorkar kiba la jia ha kylleng.
Haba jubab halor ka jingkylli lano kan kut noh ka jingiatyngkhuh bad ka KSU, u
Sangma ula ong, “Kam don kano kano ka jingkylli jong ka jingpynkut ia ka jingiakynad, kam dei satia ka jingiakynad, ngi don ha ka jingiakren, ngi dang iakren bad ngin pynthikna ba ngin iaid sha kata ka bynta kaba ngin lah ban pynbeit ia ki jingsngewkhia ym tang jong ka KSU hynrei wat ia ki jingsngewkhia jong kiwei ki seng ruh”.
“Ngi ngeit skhem beit ba ka jingiakren ka long kaba kongsan bad haba ngi lap ia kino kino ki jingsngewkhia kiba long kiba kongsan, ngim ju kiar ha kaban iakren bad kino kino ki seng ruh bad katei kadei ka nongrim kaba ngi lah shim”.
“Ngi lah pynpaw ia kane, ym tang halor kane ka jingjia hynrei ngi lah pyni ruh ha ki por jong ki jingjia kiba lah dep bad ia ki jinglong jingman kaba ngi lah mad, kumta ngi dang trei sha katei ka bynta” ula bynrap.
U Myntri Rangbah ula ong, ba ki sienjam kiba tyngeh yn shim pyrshah ia ki riewshimet kiba la shim ia ka ain ha la ki kti, khlem da peit ki don bad kano kano ka kynhun.
“Ha ka rukom treikam baroh kawei, ki don katto katne ki jingjia kiba lah ban jia hynrei kumba nga lah ong biang, haba ngi lap ia kino kino ki sabut pyrshah iano iano ruh kiba shim ia ka ain ha kti, kam dei ia kano kano ka kynhun ne ka seng, hynrei kino kino ki riewshimet kiba donkti, yn sa leh ia kaba donkam katkum ki kyndon ain, kata kadei ka nongrim kaba shai kdar ka jong ngi” ula ong.
“Ha kaba iadei bad ki mat bad ki jingsngewkhia kaba don da ki kynhun, kum ka sorkar ngi long kiba kloi ban iakren bad ha ki por ban wan ngin bteng ban long kiba kloi ban iakren bad ban iatai ban pynbeit ia kitei ki jingeh” ula bynrap.
Halor ka jingshah ktah ka kam jngohkai bad ka jingpynsangeh noh ban sah ha ki Hotel, na ka jingjia ha ka 19 tarik u Nailar kaba la mih ki kam thombor, u Sangma ula ong, ba kane ka bynta kadei kaba la shah ktah jur bha hynrei mynta suki suki kala sdang ban kiew biang.
“Ngi hap ban long kiba husiar, haba mih kum kitei ki jingjia, kin dei hi kito kiba donbynta lang ha ka kam, ki briew jong ngi hi kiban shah ktah. Kumta ka kam ia umsnam kan ym pynbeit ia kano kano ka jingeh ne iarap iano iano ruh” ula ong.
“Ka kam jngohkai kala shah ktah jur bha, hynrei mynta kala sdang ban khyllie biang na katei, baroh ki jingpyrshang la shim ban pynthikna ban tei biang ia ka jingskhem jingmut kaba kynthup lang ia ka jingshim ia ki sienjam kiba tyngeh da ka sorkar pyrshah ia ki riewshimet kiba donkti ha ka kam ia umsnam bad ban pynthikna ba ha ki por ban wan, kin ym don shuh kum kitei ki jait jingjia” ula ong.
Haba kyntu ia ki seng bapher ban shim ia ki lynti kiba jai jai, ula ong, “Ngi kwah ban kyntu ia baroh kiba donbynta lang, ia baroh ki seng, ba ngi donkam ban sngewthuh ba kin don ki jingktah na kaei kaba ngi leh bad haba ngi don ia ki ishu kaba ngi dei ban pynsngew shabar bad ia ka jingsngewkhia kaba ngi don, ia kane lah ban leh ha ka rukom kaba dei, ka rynsan kaba dei bad lyngba ki lad ki lynti kiba dei”.
“Ka jingiaumsnam kam dei ka jubab bad ka jingiaumsnam kan lam shuh shuh sha ka jingpynjulor ia ka ioh ka kot, ia ka kam jngohkai ka jong ngi khamtam eh ba kan ktah jur hi ia ki briew ki jong ngi. Ngi lah iohi ha ki por kiba lah leit, ba ka kam jngohkai baroh kawei kala shah ktah lut, hynrei ngi dang trei mynta bad ngi lah iohi ruh ba ka jinglong jingman kala nang bha suki pa suki bad na ka liang jong ka sorkar kala shim ia baroh ki lad ban pynthikna ban wanrah biang ia ka shongsuk shongsain” ula bynrap.
