Shillong, Risaw 06 : U Myntri Rangbah ka Jylla Conrad K Sangma ha ka sngi Ba-ar ula ong ba ka jing tih par dewiong thliew khnai ha Meghalaya kan ym wanphai shuh bad ka Sorkar ka dang iapynbeit bad ka Sorkar Pdeng ban pynduna ia ka jaka mining lease sha ka 5-10 hectare khnang ba ki nongtih jong ki par ba rit kin lah ban pyntrei da ka jingstad saian.
U Conrad u iathuh ba ma u ha ryngkat ka MLA kong Santa Mary Shylla, kila iakynduh ia u Myntri ka Ministry of Coal & Mines ha ki khyndiat bnai bala leit bad la buh ia ka jingtyrwa ban pynduna ia ka jaka ai lease na ka 100 hectare sha ka 10 hectare duna, lada lah sha ka 5 hectare.
“Ka Sorkar India kala pynpaw ia ka jingsngewtynnad bad kila thaw ia ka Committee. Ka Committee kala iakynduh 3-4 sien bad Nga la iakren ruh bad ka Committee bad ki Dkhot kin sa wan shen sha Meghalaya ban nangiakren shuh shuh bad ki kynhun kiba don bynta” ula ong.
Ula ban jur ba ka jingtih dewiong ka dei kaba la shah ban leh ha Jylla bad ia ka jingkhang ka NGT lah weng naduh u snem 2019.
“Kam dei ka jingkylli ban shah tih lane bym shah tih. Ia ka jingtih lah shah ha Meghalaya, ia ki par ruh lah dep ban plie. Ka jingeh ka long ha ka rukom tih kaba phin leh, kane ka dei ka jingeh jong ka kam” ula ong.
“Ia ka jingkhang tih dewiong la weng naduh u 2019 da ka kyndon ba phi hap ban bud ia ka MMDR Act kaba buh ia phi ba phin hap tih da ka open cast. Ka jingsngewkhia ka long ia ka jingshngain ki nongtih par bad ka jingshngain ka mariang” ula bynrap.
U Myntri Rangbah ula kren shai ba ym lah shuh mynta ban nang pynim ia ka rukom tih par kaba rim (tih thliew khnai).
“Lada phi iakren ban phai biang sha ki rukom tih thliew khnai ba mynshuwa, kane kan ym jia satia namar dei kane kaba la wanrah ia ka jingkhang tih dewiong. Ka Sorkar kala kren shai ba ka jingshngain ki nongtih par bad ka mariang ka dei ka kam ba hakhmat eh jong ka Sorkar India, ka Supreme Court bad kumjuh ruh ka NGT” ula ong.
Halor ki kyndon ban pynjynsur ia ki nongtih jong ki par kiba rit, ula ong “Ka jingdonkam jaka ka lah ban hiar sha ka 5 lane 10 hectare hynrei ka rukom tih hi kan long beit da ka jingstad saian”.
