Shillong, Risaw 06 : Ka shi wat ialehkai ka lympung Shillong Premier League 2026, ka la khreh ban jam noh sha kaba kut, ha kaba ka resol na ka jingiakhun ba hynne ka lah sngi U Blei ka long ba ka Nangkiew Irat FC ka la lah ba kan pyniakhaid bad ka MLP FT da mar 2 kol, hynrei kumba ka long ba ki khmat kin phai pat sha ka jingiakhun kaban long lashai ka sngi, ha kaba ka Mawlai SC kan mih madan ban iakhun pyrshah ia ka Rangdajied United FC.
Haba phai sha ka jingiakhun, ia ki artylli ki kol ka MLP FT la thep da u Everestarly Rynjah (12′) bad Rapborlang Marwein (21′), katba na ka liang ka Nangkiew Irat la thep da u Yhoto Lohe (13′) bad u Neblejohn Lyngdoh (85′).
Kane kan dei artad ka jingialehkai ba khatduh ia ka Nangkiew Irat ha kane ka samoi ialehkai ba mynta, kaba lehse ka la biang ia ka ban lait na uta u line saw ban hiar na kane ka lympung iakhun, hynrei kan dang hap ba kan ap ia ki resol kiban mih na ki jingiakhun jong kiwei pat.
Da kane ka jingiakhaid ba mynta ka sngi, ka Nangkiew kan don ha ka kyrdan kaba phra hadien ba ka la ioh ban khur 9 point mar ia ryngkat bad ka Sawmer, hynrei kan duh ia ka kabu ksiar ban ioh aireng sha ka lympung ka SSA Super Cup, kaba plie lad tang ia ki 6 tylli ki kynhun ba ioh khur bun point ne Top 6.
Katba ka MLP FT kala kiew sha ka kyrdan kaba san hadien ba ka la ioh ban khur 11 point bad sah ruh sa kawei ka jingiakhun ba kan pyndep.
Kumba la kdew haneng, ki khmat mynta yn hap ban ia phai sha ka jingiakhun kaban long lashai ka sngi, ha kaba ka Mawlai SC kaba don ruh halor duh ka miej iakhein point kan aireng pyrshah ia ka kynhun ba don ha ka kyrdan ba 6 ka Rangdajied United FC, kaban long ha ka por 3 baje nohphai sngi.
Kane ka jingiakhun kaba 90 minit pura ka lah ba kan mih ruh ka khubor ka kynhun ban rah ia ka nam lahduh.
Lada ka Mawlai SC ka jop ia kane ka jingiakhun, kan pynlong ia ka kynhun ba kan rah ia ka nam kum ka lahduh, kaban long ka sien kaba lai hadien ba ka la lah ba kan rah teng ha ka samoi ialehkai 2022 bad 2023.
Kumban shu phai dien, kane ka khubor ka lam ia syriem kum ha ka samoi ialehkai ba la dep u snem 2025, kaba kum ka kynhun, ka Mawlai ka la iakhun pyrshah ia ka Rangdajied, kaba hangne ka donkam ban khur ia ka jingjop ban ioh phong ia ka pansngiat nam lahduh, pynban kawei kaba jia pat ka long ba ka Rangdajied, kaba la lah ba kan pynkut ia la ka samoi ialehkai hapdeng ka miej iakhein point, ka la ieng iakhun tyngeh ban iakhaid da mar shi kol, kaba pynlong ia ka Mawlai ban bat ia ka kyrdan kaba lai bad ka nam lahduh la rah da ka Langsning FC.
