Shillong, Risaw 06 : Ka National People’s Party (NPP) ha ka sngi Ba-ar, kala pyni ia ka jingialong kawei kum ka kynhun, da ka jingwan iashimbynta lut ki nongmihkhmat paidbah (MLA) sha ka jingialang jong ka party kaba la pyniaid da u National President ka party bad Myntri Rangbah Conrad K Sangma ha Shillong.
Ha ka jingialang la wan iashimbynta da u National General Secretary bad Symbud Myntri Rangbah ka Jylla Bah Sniawbhalang Dhar, President ka NPP Meghalaya bad Symbud Myntri Rangbah Bah Prestone Tynsong bad baroh ki MLA ka NPP, kaba la pynlong hapoh ka Iingsah u Myntri Rangbah ha Shillong.
Kane ka jingwan iashimbynta lut ki MLA kala wan jia ruh ha ka por ba saphriang ki khubor hamsaia haki social media ba don ki jingiapher jingmut hapoh ka party bad ka jinglah ban don ka jingphet seng jong ki katto katne ngut ki MLA.
U Myntri Rangbah Conrad K Sangma na ka por sha ka por ula kyntait ia kine ki khubor antad, haba pynpaw ba ka NPP ka iai long kawei ka kynhun bad ba um kwah ban kynthoh eiei halor ki khubor hamsaia kiba la pynmih khlem ki jingtip kiba thikna.
U President ka NPP Meghalaya bad Symbud Myntri Rangbah Bah Prestone Tynsong ruh ula kyntait ia ki khubor ba don ka jingpyrshang jong ka BJP ban pynpait ia ka NPP, haba ong ba kam don satia kano kano ka jingpyrshang bad kren skhem ba ka Sorkar MDA kan pyndep ia ka samoi treikam ba pura.
U National General Secretary bad Symbud Myntri Rangbah Bah Sniawbhalang Dhar, ula pynpaw ba baroh 33 ngut ki MLA ka NPP ki dang iatyllo mlon, haba kyntait ia ki khubor ba ki don ki MLA kiba thmu leit iasoh sha ka BJP.
Ka jingialang ba myntaka sngi ka pyni ruh ba ki MLA ka NPP ki iadonlang hapoh ka jinglong nongialam jong u Conrad K Sangma.
Ka jingialang kala ai ruh ka lad ia ki nongialam ka party bad ki nongmihkhmat paidbah ba kin iakren ia ki kam jong ka party bad pynskhem biang ia ka jingiapynleit jingmut lang ha kaban pynkhlain ia ka NPP bad ka Sorkar MDA.
Da ka jingiadon lut ki MLA ka NPP, ka party ka kwah ban pynkut noh ia baroh ki khubor antad kiba pynsaphriang ha ki social media.
