Shillong, Risaw 6: U Myntri Rangbah ka Jylla bad u National President ka NPP u Conrad K. Sangma hynne ka sngi Baar ula kyntait ia ki khubor ba bun ngut ki MLA ka NPP ki thmu ban leit pyniasoh bad ka BJP bad ka bynrap ba ka Sorkar MDA-II hapoh ka jingialam ka jongu ka long kaba skhem.
Haba kyntait ia ki khubor ba kidei ki bym don nongrim, u Conrad Sangma ula ong, “Kine kim dei eiei hynrei tang ki jingpynsaphriang ia ki hamsaia bad kine kidei ruh tang ki jingmutdur jong ki katto katne”.
“Kine kidei tang ki jingmutdur kiba ki briew kila pynsaphriang bad kiba la shu rai bad pyrshang ban pynman ia kaei kaei kaba kila pynmih hi. Nga kren shai ba kine kim don eiei hynrei kidei tang ki jingpynsaphriang ia ki hamasaia” ula ong.
U Myntri Rangbah ula ong, ba ki katto katne bad ki lad pathai khubor kila pynmih ia kitei ki jingsngewkhia.
“Katto katne kiba sngewkhia, lehse ki lad pathai khubor kila thaw bad ki riewshimet kila thaw hynrei to ai ba ngan pynthikna ba ki MLA, ka sorkar synroplang bad ia ki paitbah baroh, ba kam don kano kano ka jingpyrshang bad kam don eiei hi ruh ban sngewkhuslai ha kaba iadei bad katei ka mat” ula ong.
U Sangma ula bynrap ruh ba ka sorkar MDA kaba ialam da ka NPP ka long kaba skhem.
“Ka Sorkar MDA-II ka long kaba skhem bha. Ka NPP tang ma ki kala don lypa 33 ngut ki MLA bad ki iaskhem mlon bad ngi don ruh ia ki paralok kiba iatreilang ha ka kynhun synroplang” ula ong.
Ula ong, ba ka jingkhlain jong ka kynhun synroplang kam shim la don satia kano kano ka jingkylla watla kala don ka jingkylla ha kaba iadei bad ki kynhun kiba iatreilang.
“Ka jinglong jingman baroh ka lah ban kylla hapdeng ki paralok kiba iatreilang, hynrei ka jingkhlain jong ka MDA ka neh hi kumjuh bad kala don ruh ka jingiengskhem na ki paralok kaba la neh hi kumjuh bad kumta kala don ka ishu hapdeng ki artylli ki kynhun kiba iatreilang kaba dei ka kam iing kam sem ka jongki hynrei katei kam shim la ktah eiei pat ia ka jingdon paid ne ia ka jingskhem jong ka Sorkar MDA-II” ula bynrap.
