Shillong, Risaw 05 : U MLA ka North Shillong Bah Adelbert Nongrum ha ka sngi Nyngkong ula ong ba un dang iai bteng ban don beit bad ka Voice of the People Party (VPP), haba pynpaw ba ka rai ban sospon ia u da ki Nongialam ka dei kaba be-ain bad be-riti.
U Bah Adelbert, uba don mynta hapoh ka jingshah sospon, ula ong ba ka rai ban iasoh sha ka VPP ka dei kaba ialam lynti ia u da ka jingngeit ba kan dei shisha ka sur jong u paidbah.
“Nga la kren shari bha naduh ka por ba nga la rai ban iasoh sha ka VPP…Nga kwah ban don ha ka party bad ba Ngan ym mih na ka party hadien habud. Mynta nga dang don bad ka VPP” ula ong.
Haba kylli la un dang neh bad ka VPP ha u 2028, u MLA ula ong “Nga dang don bad ka VPP haduh mynta hynrei ki High Level ka VPP, kila sospon ia nga ym da ka lynti kaba dei, haduh mynta nga kam ba ka long ka jingsospon ba beain bad ba be-riti”.
Ula kdew ia ki jingduna ha ka hukum sospon, haba kam ba kane ka hukum kam shym la lah ruh wat ban batai ia ka kyrdan kaba dei.
“Kila dei ban sospon kum u MLA ka North Shillong Constituency hynrei ha ka shithi kaba ki sospon ia nga, ki thoh Adelbert Nongrum Jaiaw Umsyntiew, kumta lada nga leit sha ka Iingkashari, kin mad ia ka jinglehrain kaba khraw bha” ula ong.
“Ngan ym pdiang ia ka jingsospon ia nga namar…kam dei lyngba ka lynti kaba dei, ka dei ka jingsos pon kaba beain” ong u Bah Adlbert.
