Ka BJP kan weng ia ka jingkhang tih dewiong
Shillong, Risaw 04 : U nongialam ka BJP bad MLA ka Pynthorumkhrah Bah AL Hek ha ka sngi Saitjain ula pynpaw ba ki 8 ngut ki MLA barim ka UDP ba iasoh sha ka BJP kin nym mad ia kajuh ka nusib kum ki MLA ka Congress kiba leit iasoh sha ka TMC, haba pynpaw ba ka BJP hala suhthied hapoh ka Jylla.
Haba kynthoh ia ki jinkren u President ka Meghalaya Pradesh Congress Committee (MPCC) Bah Vincent H Pala, u Bah Hek ula ong “Phim lah ban pyndonkam da ujuh u jingthew ia man ki jingkylla ka sain pyrthei. Ka BJP ka don la ka jong ka nongrim kaba khlain bha. Phi la iohi dang shen ba kumno ki MLA bad MDC ba mynta kila iasoh sha ka BJP”.
“Ka dei ka kam jong ki lada ki MLA ka Congress ki leit iasoh TMC. Ngim don bynta eiei halor kane. Kito kiba la iasoh sha ka BJP ki long kiba skhem. Kan ym jia kumta. Ngi la pynkhlain ia ka party ba kan ialam ia ka Sorkar ha u 2028” ula ong.
Halor ki hamsaia ba ka BJP kala dawa shuki Myntri bad ka shuki Lamphang hadien ba ka jingdon MLA kala kiew sha ka 10 ngut, u Bah Hek ula ong ba um don bynta eiei ia kane.
“Nga kren shai, ngan ym shim ia kano kano ka shuki Myntri. La kan don ne kam don kano kano ka jingbujli, kane ka shong beit ha u Myntri Rangbah ka Jylla. Kane ka dei ka Sorkar MDA” ula ong.
“Don kiba ong ba ngan long Symbud Myntri Rangbah, hynrei nga ong em. Ngi dei ban ailad ia ki riew thymmai kiba dang shu wan Ai ba kin long Myntri ma ki. Ngan pynleit jingmut sha ka elekshon 2028” bynrap u bah Hek.
Halor ka kam tih dewiong, u Bah Hek ula ong ba ka BJP kala buddien ia kane ka kam ha ka kyrdan kaba hakhlieh duh.
“Kane kam dei shuh ka kam ba dang don ha Iingkasahri. Ngi la buddien ia ka bad ngin ieh ha ka jingstad jong ki nongialam na Delhi-u Myntri Rangbah Duh Narendra Modi bad Amit Shah. Ngi la kyrpad ban weng noh ia ka jingkhang tih dewiong ha Meghalaya” ula ong.
Halor ka jingiakajia khappud bad ka Assam, u Bah Hek ula ong “Ngi hap ban leit sha ki shnong ki thaw ban pynbeit ia kane. Ngi donkam ia ka jingsuk bad ka jingia im ryngkat. Shim iaki jingai jingmut jong ki briew kiba sah ha ki jaka ba iakajia-la ki kwah ban neh bad ka Assam lane Meghalaya. Ngi dei ban ieh ha ka rai uba bun” ula ong.
“Ki jingjia ba rit ba ria kin jia beit. Ngim lah ban shu sngap ia uwei ne arngut” ula bynrap.
