Shillong, Risaw 04 : U Chairman ka Grand Council of Chief of Meghalaya (GCCM) bad Co- Chairman ka Meghalaya State Planning Board (MSPB) Bah John Kharshiing ula phah ia ka kaiphod ka National Commission for Scheduled Tribe (NCST) sha u MP ba marwei ka Jylla sha Rajya Sabha, James PK Sangma ba un wanrah ha Parliament.
U Bah John ula kyrpad ia u James ba un kren halor ka jingdawa bala slem bha ban pynkylla ia ka Article 338 bad 338A jong ka Riti Synshar ka Ri, kaba iadie bad ka National Commission for Scheduled Caste bad Scheduled Tribe.
Kane ka jingdawa ka thmu ban pynthikna ba ia ka kaiphod jong ka NCST, ha ryngkat bad ka kaiphod halor ki kam bala leh da ka Sorkar, la wanrah ha Parliament hapoh ka por bala buh.
Ka jingkyrpad ka kdew ia ka jingai jingmut jong ka National Commissioner for Scheduled Caste and Scheduled Tribe ha ka kaiphod 1997-98. Ka Commission kala ai jingmut ba ia kane ka kaiphod dei ban wanrah ha baroh artylli ki Iingdorbar ka Parliament hapoh ka lai bnai naduh ba aiti sha u President, katba ia ia ka kaiphod jong ki kam bala leh da ka Sorkar dei ban wanrah hapoh ka hynriew bnai.
U Bah John u iathuh ba ia kane ka kam lah pynsngew la bun sien da ki seng ki riewlum bad ki nongmihkhmat ha baroh kine ki snem, kynthup lyngba ki jingthoh bala phah ha u 2010, 2012 bad 2015.
Ula pynkynmaw ruh ia ka jingialang bad ki jingthoh bala phah sha ka Ministry of Tribal Affairs ha u snem 2015 bad ruh sha u Chairman ba mynshuwa jong ka Parliamentary Standing Committee on the Welfare of Scheduled Caste and Scheduled Tribe.
Haba batai ia kine ki jingpyrshang, ula ong, ym pat don satia ka jingpynkylla haduh mynta ia ka Article 338 bad 338A ban buh ia ka por kaba thikna ha kaban wanrah ia ka kaiphod ka Commission hapoh ka Parliament.
U Bah John ula kdew ruh ba ki don bun ki kaiphod ka NCST ki bym pat la pynrung ha ka thup ki mat iakren hynrei ki bym pat shym la wanrah pat ha baroh artylli ki Iingdorbar jong ka Parliament.
Ula ong ba ka jingbym don ka por kaba la buh thikna kala pyntlot ia ki lynti jong ka jingbishar ki Parliament ia ki kam ba dei jong ki Scheduled Tribe.
Ha ka jingialang ba long ha ka sngi Saitjain, u Bah John ula batai ia u James halor ka histori jong ka jingdawa bad ki jingthoh bala ai ha kine ki shiphew snem tam.
U James ula ai ka jingkular ba un sa pan ia ki jingtip kiba bniah halor kane ka kam bad kaei kaba long ba man ha Parliament.
