Shillong, Risaw 02: Ka Sorkar Jylla hynne ka sngi, kala pynlong ia ka jingkynmaw burom ia ka lyngkhuh sngikha jong u Mahatma Gandhi u Kpa ka Ri, da kaba buh syntiew ha u motdur ba shi rynnieng jong une u riewkhraw uba don ha Main Secretariat, Shillong.
Ha kane ka jingleh burom ia u Mahatma Gandhi, ia kaba la tip kyrteng pura kum u Mohandas Karamchand Gandhi, la iashimbynta da u Principal Secretary ka tnad Arts and Culture bad Home (Police) u Bah F.R. Kharkongor, u Commissioner and Secretary u Vijay Kumar Mantri, u Director jongka Meghalaya Administrative Training Institute (MATI) u Swapnil Tembe, ki heh ophisar sorkar bad ki nongtrei jong ka Meghalaya Secretariat.
La pynlong ia kane ka jingkynmaw burom, ka long kum shi bynta ban rakhe ia ka lyngkhuh sngikha jong u Mahatma Gandhi bad ban pynkynmaw ia ka nongrim jong une u nongialam uba la iaid ha ka lynti jong ka hok, jingsuk bad ka jingbym iaumsnam, kaba long kaei kaei kaba kongsan bad kaban iai ai mynsiem ia ki pateng ban dang wan.
Kane ka sngi, kadei ruh ka kabu ia ki heh ophisar ka jylla bad ia ki nongtrei ba kin iengskhem halor kitei ki nongrim kiba kordor kiba la maitphang bad ialam da u Mahatma Gandhi bad kadei ruh kaba iahap bha ha ka kam shakri paitbah.
