Shillong, Risaw 01 : U Superintendent of Police ka East Khasi Hills Bah Vivek Syiem ha ka sngi Palei ula kynthoh jur ia ka jingshna video AI ba pynthohbria ia u lem bad ia u Symbud Myntri Rangbah Bah Prestone Tynsong, kaba la saphriang paidbah hadien ka jingkhynra ka KSU ba sei pyrthei ia ka jingkynnoh khrong pisa beain ki Pulit ha Mawkhanu bad Thangshalai.
“Ha ka juk AI, shibun ki memes la shna. Ngin sa peit ia kaei kaba ngi lah ban leh” ong u Bah Vivek.
U ong ba ka Tnad Pulit kam shym la shah ne pynshlur ia kum kine ki kam beain (khrong pisa).
“Peit, ha ka juk AI shibun kki video la iashna. Kam dei ka jingshisha ba ngi la ailad ne pynshlur ia ki Pulit jong ngi ba kin leh ia kum kitei ki kam. Ka dei ka kam kaba khia bha. Ha ka jingshisha, ki briew kila dei ban wan ai jingujor, ejahar pyrshah ia ki briew kiba lum pisa beain ha ka jaka ban iashna memes” ong u SP.
Haba iada ia ka Tnad, ula ong “Tang ka East Khasi Hills marwei ka don haduh 2500 ngut ki briew. Ym baroh ki long kumta. Ngi lah ban don u soh aple ba pyut hynrei kam mut pat ba baroh kawei ka Tnad ka long kumta”.
