Shillong, Risaw 01: Kum shi bynta ban pynsuk iaki nongthep Vote, ka Election Commission of India (ECI) kala rai ba ki nongthep vote kiba ioh notice ha ka Special Intensive Revision (SIR) 2026, kim donkam shuh ban leit sha ki ophis treikam jong ki tnat elekshon na ka bynta ki jingbishar, ong u Chief Electoral Officer u Dr BDR Tiwari
“Ki BLO kin leit sha ki iing jong ki nongthep vote kiba la ioh Notice namar ba ym lap ia ki ne ki don ki jingbym iahap haki kyrteng, kin lum ia ki kot ki sla kiba donkam bad kin thep ia ki ha ka ECINet ban rai da ki ERO,” la ong u Tiwari.
“Kumta ki paidbah kim donkam ban leit sha ka ophis jong ERO/AERO ban shah bishar. Tang ha ki khep ba donkam, kumba la bthah da ka ERO, yn donkam ban shah bishar bad kum kane ka jingbishar kan kham bha ban leh online,” u la ong.
U CEO ula ong ruh ba lada donkam ban bishar, ki paidbah ki lah ban ai bor ïa uno uno u dkhot jong ka longïing ban wan na ka bynta jong u, katba ki DEO kin buh ïa ki Help Desk bad ki Special Camp na ka bynta ki briew bym don iing, ki nongbylla bad ki briew kiba duna haka ioh ka kot.
U Tiwari u la ong ba ka Commission ka la pynjlan ruh ia ka tarik ba khatduh ban pynmih iaka Final Publication sha ka 26 Risaw.
Haba ia dei bad ka jingpyntreikam iaka SIR ha Meghalaya, u CEO u la ong ba ka jylla Meghalaya ka la pyndep bishar haduh 6,06,939 tylli na ki 6,51,735 tylli ki Notice kaba kot sha ka 93.13 percent haduh ka 1 tarik Risaw.
Na ki 21,69,243 ngut ki nongthep Vote kiba don ha ka thup kyrteng, la pynmih ïa ki jingpynbna (Notice) na ka bynta 6,51,735 ngut, kynthup ïa ki 2,22,786 ngut ki No Mapping bad 4,28,949 ngut ki jingbym ïahap map. Katba 1,194 ngut ki nongthep vote la lap ba kim lah ban shah kynthup haka thup thep, 19,71,723 ngut ki dang ap ban ioh ban shah kynthup haka thup kyrteng thep Vote.
Haka jingpynkylla ka la ïohi ruh ïa ki 23,259 tylli ki phorm ba la pynkylla digital, 12,624 tylli ki phorm 6,1,616 tylli ki phorm 7, 1,590 tylli ki phorm 8 na ka bynta ban pynkylla bad 7,429 tylli ki phom 8 na ka bynta ban pynbeit, ha kaba 1,814 ngut ki BLA ki trei ha ka jylla baroh kawei.
“Ym dei ban iehnoh ia ki ba donhok ban shah kynthup haka thup kyrteng thep Vote. Iatreilang bad ki BLO bad pynbiang ia ki kot ki sla kiba donkam,” la kyrpad u Tiwari.
