Shillong, Risaw 1: U Nongialam bad MLA ka UDP u Bah Paul Lyngdoh ha ka sngi Palei, ula ong ba ula pynsngew lah slem halor ka kam nongialam hapoh ka seng UDP, hynrei kine ki jingmaham ki jong u kidei kiba la shah kyntait, kaba la lam sha ka jinghiar na ka jingdon 12 ngut ki MLA sha ka 4 ngut mynta.
Haba kylli la un tynruh ban bujli nongialam, hadien ba 8 ngut ki MLA ka seng kila phet noh sha BJP, u Bah Paul ula ong” Ka jingdawa ban don ia ka jingkylla kadei kaba lah ialam da nga, ha ka elekshon kaba lah dep, kaba la don ka jingiakhun hapdeng ka jong nga bad u Bah Metbah. Ha katei ka por ula jop da 3 vote pyrshah ia nga namar ba nga dang shu rem ia ka Elekshon MLA ha u 2013.
“Ng iai pynsngew ia ki nongialam jong ka seng bad nga la kdew beit beit ba ngi donkam ia uno uno uba don ia ka jingiohi jngai nalor ka constituency” ula ong.
U Bah Paul Lyngdoh ula kynnoh ba u President ka seng um dei uba iar ka rukom pynleit jingmut.
“Phim lah ban don ia u President ka seng, uba buh hakhmat ban thaw ia ka District tang hala ka constituency bad ia la u paramarjan, kaba ha katei ka por la mihkhmat da u Bah Brolding Nongsiej. Phim lah ban don ia ka rukom pyrkhat kaba khim jingmut, kaba tang kawei ka shithi kaba ula soi kadei na ka bynta ban pynrung ialade hapoh ka kynhun myntri” ula ong.
“Baroh ki jingthung kam ia ki nongialam saiñ pyrthei (Political Appointee) bad phi lah ban leit kylli na baroh ki MLA, ym shim la don uwei ruh na ki uban ioh ia kano kano ka jingshah bynshet ia ka kam ne ‘Political Assignments’ lyngba u President ka party. Don kiba la leit ban tied ia ka jingkhang jong u Conrad K Sangma, don kiba la leit sha u Bah Prestone. Haba mih kum kitei ki jingjia, balei ngi buh ia u PP Leader? Kitei ki mat kila nang iai kynton” ula bynrap.
“Nga jied ban kren bad ban kdew beit ia ka mat. Nga lah sdang ia kaei kaba nga dei ban ong, hynrei la kyntait noh da ki nongialam bad ki nongkitkam bad khatduh klhatwai ka seng kala hap ban siew ia ka dor. Na ka 12 kaban lah syndon ban poi shaduh 1, kaba long kaba heh tam syndon ka jinghap jong ka UDP,” ong u Bah Lyngdoh.
Haba kylli, la u Bah Metbah Lyngdoh u dei ban hiar shuki noh, “Nga tharai kan bha shibun, ba ma u hi un ai ia ka jubab kaba biang tam halor kane ka jingkylli namar ba ula leh ia kaei kaei, kaba ula rai hi bad mynta u kwah ban leh ia kaei kaei kaba long pyrshah ia kaei kaei kaba ula dep ban leh ne rai”.
