Shillong, Risaw 01 : Da ka jingduna paid ka UDP sha ka shi digit, u nongialam ka party bad MLA ka West Shillong Bah Paul Lyngdoh ha ka sngi Palei ula ong ba ka sienjam ba bud jong u ha ka sain pyrthei kan shong eh ha ka jingbishar bniah ia ka jinglong jingman bad ka jingmut jingpyrkhat jong ki nongkyrshan, ki nongtrei bad ki nongthep vote.
“Baroh ki lynti ki plie, bad kaba kham kongsan eh ka long ban sngewthuh ia ka jingmut jingpyrkhat jong ki nongkyrshan, ki nongtrei bad baroh ki nongthep vote” ong u Bah Paul haba kylli la un dang iai neh bad ka UDP lane leit iasoh noh sha kiwei ki party.
Une u Nongialam ula niew ia ka jinglong jingman ba mynta jong ka UDP kum kaba phylla bha.
“Ngi la pyrkhat ia baroh ki lad ki lynti. Kiei kiei baroh ki shong ha ka jingbishar bniah ia ka jinglong jingman. Kane kam dei kaei kaei kaba iaid beit iaid ryntih naba ka party kala hiar sha ka shi digit bad lah ban nang hiar shuh shuh” ula ong.
Ula ong ba kiei kiba long ba man hapoh ka ri ruh kan dei kawei ka nongrim ba un sa shim rai. “ Namar kine kiei kiei, ha ryngkat bad kaei kaba jia hapoh ka Ri- ka kynrum kynram halor ka Election Commission, ka kynrum kynram halor ka SIR- baroh kine ki kam kin long shibynta ha ka jingshimrai jong nga” ula ong.
Haba kylli la kane ka jingpynbeit mynta kan wanrah jingkylla ia ka jingkhein ha ka elekshon 2028, u Bah Paul ula ong ba ka Meghalaya kala sakhi ia ka jingialeh pyrshah kaba jur jong ki seng sain pyrthei hashuwa ki elekshon bad ki ia snohkti lang hadien ka elekshon, namar ym don paralok ne nongshun ba shirta hapoh ka sain pyrthei.
“Ka jinglong jingman kumba long mynta kam pat shai satia. Ngi dang don ka elekshon shiteng samoi ka Shillong Lok Sabha ka ban sa long. Ngi dang don ka elekshon GHADC ka ban sa long. Kine ki dei ki ar bynta kaba ngi hap ban jam khnang ban ioh ia ka jingbishar kaba shai ia ka jinglong jingman ka sain pyrthei ha ka Jylla” ula bynrap.
