Shillong, Nailur 29: Ka sorkar jylla ka dang pynjur ia ka jingpahara ha shi lynter ka khappud Indo-Bangladesh ban peitngor ia ki jingwan rung tuh ki nong Bangladesh, bad u Symbud Myntri Rangbah ba khmih iaka tnat kam pohiing (Police) Bah Prestone Tynsong u la pyntip ba la bthah ia ki pulit bad BSF ba kin kham trei shitom ban khanglad iaka jingwanrung beain shapoh ka Jylla.
“Nga la khot ia ka jingialang hapdeng ki shipai iada khappud BSF bad ki pulit bad ngi la iakren halor ka jingwan rung tuh kaba la jia jan man ka sngi. Nga la bthah ia ki pulit bad ki BSF ba kin kham trei shitom khnang ba ngin pynthikna ba ka jingwan rung tuh kan nym jia,” la ong u bah Prestone.
Halor ka jingiai don ki nong Bangladesh ba wanrung tuh sha Meghalaya, u Bah Prestone u la ong ba ki nongwan rung tuh ki dei kham bunsien ki nongshong shnong ba rit paid kiba pyrshang ban mih na Bangladesh namar ka jingbym shngain ka shong suk shong sain hatei ka ri.
“Kam dei ka jingkylli jong ka jingsngewkhia. Baroh ngi tip ia ka jinglong jingman ha Bangladesh. Kiba bun ki nongshong shnong, kumba ka paw, ki kwah ban mih na Bangladesh. Kata ka dei kaba shisha. Kam dei namar ba ki kwah ban rung tuh ban thaw jingkulmar ha Meghalaya. Kiba bun na ki kiba ngi la lap ba ki dei ki nongshong shnong ba rit paid ha Bangladesh” u la ong.
U la ong ba la iakren bniah ia kane ka kam bad la pynmih ia ki jingbthah kiba donkam.
“Kata ruh ngi la iakren bniah hynrei ngan ym lah ban iathuh shibun. Ngi la dep iakren bad la ai jingbthah sha ki bor pulit, ki bor synshar district bad kumjuh ruh sha ki BSF,” u la ong.
Haba pynpaw ïa ki jaka ba don ki nala um, ki khlaw ki btap bad ki bym don jingker sainar ha East Khasi Hills bad West Jaiñtia Hills, u Bah Prestone u la ong ba ki nongwan rung tuh ki shim kabu ïa ki khlaw ki btap bad ki bynta bym pat ker sainar.
“Katba ha East Khasi Hills bad West Jaiñtia Hills pat, kumba phi lah ban ïohi, ngi dang don ki jaka bym pat ker sainar shiah. Ka long kumba na kito ki jaka ki briew ki shim kabu. Ngam lah ban kyntait ïa ka jinglah ban don ki Dalal kiba iarap iaki ban rung sha Meghalaya” ula ong.
“Kumta ngan nym lah ban batai sani bha hynrei ngin leh iaka ba donkam” ula ong.
