Shillong, Nailur 29 : Ka jingthungkam contract ia ki Staff Nurse ha ka MCH Hospital, Nongstoin, kala shah pynsangeh ha ka sngi Ba-ar hadien ba u MDC ka VPP na Nongstoin, ula leit rung jubor hapoh ka kamra shim Interview bad pynbor ia ki kyrtong ba kin mih.
Ka Deputy Commissioner ka West Khasi Hills Hema Nayak ka iathuh ba ki bor District ha ryngkat ka Tnad ka Koit ka Khiah, kan sa shim ia ki sienjam ba dei ban shim haba iasyllok lang bad ki Pulit namar ka jingpynthut ia ka kamram ka Ophis.
“Ngi la sdang ia ka interview ha ka por 11-11:30 baje mynstep bad hadien shiteng kynta, kane kala wan jia. Ym shym la pyntip sha ngi halor kane. Ka don tang kawei ne ar ki jingthoh ha ki Social Media hynnin ka janmiet hynrei ym shym la don ba wan sha Ophis hynnin ka sngi ne wat hynne ka sngi ban ujor” kala ong.
Ka ong ba arngut ki briew kila wanrung hapoh ka conference hall ba dang iaid ka interview bad baroh arngut kila ring video. Hadien, sa san haduh hynriew ngut ki briew kila wan sha ka kamra treikam ka DC.
“Ki nongshim interview jong ngi bad baroh kila kyndit lut, ym don ba nang ban leh eiei shuh.Kane ka dei ka jingpynthut ia ka kam ka Ophis. Wat lada don mano mano ba kwah ban ai ujor eiei, ka don da ka lynti bad ka Ophis jong ngi ka long kaba pdiang ia baroh. Ngi ju khmih ia man ki jingujor, ngi pynbeit ia ki jingeh. Ha ka jaka ba kin leh kumta, kila wan ban pynthut matmet” kala ong.
Halor ki sienjam ban shim pyrshah ia une u MDC, ka DC ka ong “Ka Ophis jong ngi bad ki Pulit kin sa leh ia kaei kaba donkam. Ia kane ka eksam la pynlong da ka Tnad ka Koit ka Khiah bad ki bor district”.
“Ngi la iashong jingialang bad iasyllok bad u SP ka West Khasi Hills, ngin sa shim ia ka sienjam ba dei ban shim. Hooid, ia ka rai ban ujor ejahar ka dei ka ban dang leh”.
Tang 4 ngut napdeng ki 37 ngut ki kyrtong kiba wan sha ka Interview la lah ban pyndep ia ka interview hynne ka sngi napdeng ki 40 ngut bala khot.
Haba ai jingkular ia ki kyrtong, kala ong “Ngi la ai ka jingkular ba ka jingthungkam kan iaid beit, ym don mano mano ruh ba lah ban khang. Ngi la phaikhmat ban pynlong ia ka MCH hospital kaba lah ban treikam ha ka rukom kaba dei. Mynta ngi la sdang ia ka OPD, ngin dang ban sdang ia ka IPD bad yn dang ban plie ruh ia ka”.
Halor ka ujor bala mudui da ka VPP Youth Wing ba kdew ia ka audio clip ha social media kaba kynnoh ia ka jingbam pisa, ka Nayak kala ong ba ia kane yn hap ban pynshisha la ka jong.
“Ia mynta hi kam don satia kano kano ka jingiaid bakla, ym don ba lah ban kdew ia kaei kaei ruh. Kane ka dei ka jingthungkam kaba shai bha-ngi la pynlait ia ki marks, khot ia ki interview bad ki kyrtong ki iahun pura” kala ong.
“Halor ka audio recording na u kyrtong ba pynphriang ha ka social media, ngim pat lah ban pynthikna mano ba dei. Ki magistrate jong ngi kin sa pynshisha la ka dei kaba shisha ne ba shu thok. Lada ka dei kaba shisha, ngin sa khmih ia ka bad leh ia kaba donkam” kala bynrap.
