Shillong, Nailur 29: Ha ka jingphah ia ka khubor ba tyngeh pyrshah ia ka jingleh kam sniew ia ki khynnah, ka Iingashari Special Judge (POCSO) kala hukum ban set phatok 20 snem ia u rangbah halor ka jingthombor ia ka longrynnieng jong uwei u khynnah 7 snem ha Lumdiengjri ha u snem 2020.
Ka iingkashari jong ka R Rymbai, Special Judge (POCSO), East Khasi Hills, ha ka 16 tarik u Nailur kala pynrem ia u Bah Pyntngenlang Nongsiej ha kaba iadei bad ka Lumdiengjri PS Case No. 35(3)2020.
Katkum ka kyrwoh khubor kaba la pynmih da u Superintendent of Police, East Khasi Hills, u Bah Vivek Syiem, kane ka jingjia kala paw pyrthei ha ka 16 tarik u Lber 2020, haba ki kmie ki kpa jong utei u khynnah kila leit ujor ejahar pyrshah ia u Bah Nongsiej uba la leh be-ijot ia u khun shynrang u jongki uba dang don 7 snem ka rta.
Ki pulit kila rejistar case hapoh ka Section 4/8 POCSO Act, la kem ia utei u nongleh ia katei ka kam runar bad hadien la Chargesheet ia u hapoh jongka Section 7/8 POCSO Act vide CS No. 06/2022 jongka 28.01.2022.
Hadien ka jingtian bishar, ka iingkashari kala lap ba ula leh bakla hapoh jong ka Section 6 jongka POCSO Act bad la hukum ban set ia u snem ha phatok bad ka jingdain kuna kaba T.10,000. Ka jingpulom ha kaban siew ia katei ka kuna kan khring ha kaban set phatok sa 6 bnai ryngkat bad ka jingshah pynshitom kaba tyngeh.
Ki pulit kila pyntip ba une u briew udei uba la shah set lypa ha phatok mynta la 9 bnai bad 4 sngi kum u briew uba don hapdeng jong ka jingshah tian bishar.
Ia kane ka jingtohkit la leh da u Retd. UBSI SA Sangma.
