Shillong, Nailur 28 : Ka Bharatiya Janata Party (BJP) ha Meghalaya ha ka sngi Ba-ar, kala nang suhthied ha ri-lum Jaintia da ka jingwan ki MLA/MDC barim lem bad 200 ngut ki nongkyrshan ban iasoh sha ka party ha kaba u nongialam ka party bad Myntri Sorkar Bah Sanbor Shullai ula ong ba ki paidbah ka Jylla kila iohi shai ia ki jingkynnoh pyrshah BJP.
U MLA barim ka Nartiang Bah Draison Kharshiing ula leit iasoh sha ka BJP ha ryngkat bad ki nongkyrshan ha ka jingialang kaba la pynlong ha Shillong.
Haba pdiang ia ki sha ka party, u Bah Sanbor ula ong “Ngi pdiang sngewbha ia u Bah Draison Kharshiing lem bad ki 200 ngut ki briew na ri-lum Jaintia sha ka longiing ka BJP. Kiba bun na ki, ki dei na ka Shangpung bad Raliang constituency”.
U Bah Sanbor uba dei ruh u Myntri ka Arts & Culture, ula ong ba kine ki dkhot thymmai ki dei kito kiba don mynshuwa ha ka NPP, VPP, Congress bad kiwei ki party.
Ula kam ba ha ka jingleit iashimbynta jong u dang shen ha ki cultural prokram ha ri-lum Jaintia, kiba bun ki nongialam ka thain kila wan kren ia u bad pynpaw ba ki kloi ban iasoh sha ka BJP.
“Kila pyntip sha nga, ‘ngi kwah iasoh sha ka BJP namar ngim don jingngeit shuh haki jingkynnoh lam ler ba ka BJP ka dei kaba shun ia ki khristan bad kan khang bam doh masi’.
Kane ka dei ka jingkynnoh jong kiwei ki seng sain pyrthei arbnai lai bnai shuwa ki elekshon. Hadien ka elekshon, baroh ki ong “BJP ke Saath bhai bhai’ namar ki top ba hapoh ka jingialam u Myntri Rangbah Duh Narendra Modi, ka roi ka par bad ki jingmyntoi kan wan tang bad ka BJP” ong u Bah Sanbor.
Haba kynthoh tyngeh ia ki seng sain pyrthei ba don ha Liang Pyrshah, ula ong “ka bih bala ber da kiwei pat ki seng sain pyrthei kam dei shuh kaba dang pdiang da ki paidbah ka ri-lum Jaintia bad ka Meghalaay. Ki paidbah kila iohi jngai bad kila sngewthuh ba tang ka BJP kaba lah ban leh eiei halor ki jingeh jong ka Jylla”.
Haba pynpaw ia ka jingsngewskhem na ka bynta ka elekshon MLA 2028, une u nongialam ka BJP ula ong “Ngi hap ban trei shitom ban poi sha man ki kyndong kynshrot jong ka Jylla. Lada ngi trei shitom, ngin sa thaw ia ka Sorkar ha u 2028”.
Halor ki khubor hamsaia ba thmu pynshong synjor ia ka sorkar MDA ba ialam ka NPP, kaba ka BJP ruh ka dei ka paralok, u Bah Sanbor ula kyntait ia kum kine ki jingkynnoh.
“Kam don satia kano kano ka jingthmu ban pynshong synjor ia ka Sorkar. Ngi ai ka jingshaniah ba pura bad ka jingsngewskhem ha ka jinglong nongialam u Myntri Rangbah Conrad K Sangma” ula bynrap.
