Nongstoiñ, Nailur 28: Ka West Khasi Hills District kala sdang ia ka jingrakhe jubili ksiar ka ban neh baroh shibnai halor ka jingdap 50 snem jong ka District, da ka jingplie pyrda ia ka hakhmat ka Ophis ka Deputy Commissioner.
Ka Deputy Commissioner Hema Nayak kala plie pyrda ia kane ka jingrakhe ha ka jingiadonlang u Superintendent of Police H. Kharkongor, ADC V. Swer, MCS, BDO Mawshynrut R. Kharkongor, MCS, Assistant Commissioner Anju, bad ki Ophisar lem bad ki Nongtrei jong ki Tnad bapher bapher.
Ka Deputy Commissioner haba kren ha kane ka jingïalang, ka la kyntien kyrtiang dien sha ka jingïaid lynti jong ka West Khasi Hills District ha kine ki 50 snem. Ka la kren ruh shaphang ka lynti ban nang kiew bad ïaid shaphrang jong ka District hadien ka Jubilee Ksiar.
Ka la kdew ïa ki jingeh bapher bapher kiba ka District ka la ïakynduh ha kine ki snem bad ka la kyntu ïa ki paidbah, khamtam ïa ki samla, ban bteng ban ïaid shaphrang da ka jingminot bad ka jingsngewskhem. Ka la pynpaw ruh ïa ka jingkiew shaphrang jong ka West Khasi Hills ha ki liang bapher bapher, kynthup ïa ki jingïalehkai, ka liang ka put ka tem ka rwai ka siaw bad ka liang ka pule puthi.
Ka Deputy Commissioner ka la kdew ruh ba ka jingïashimbynta jong ki samla na ka District ha ki eksamin ka ïoh kam ïoh jam ka dang duna, kaba pynlong ruh ba ki dang duna ki ophisar bad ki nongtrei sorkar kiba mih na West Khasi Hills.
Ka la kyntu ïa ki samla ban shimkhia bad ban ïashimbynta kham bun ha ki eksamin kiba pher bapher, khnang ba kin lah ban mih bun ki ophisar bad ki nongtrei sorkar na West Khasi Hills kiba lah ban noh synñïang sha ka roi ka par jong ka district bad ka Jylla.
Nalor nangta, ka la pyntip ruh ba ka jingrakhe ïa ka Jubilee Ksiar kan bteng baroh shi bnai bad yn pynkut ha ka 28 tarik Risaw 2026. Ha kine ki sngi jingrakhe la pynkhreh ïa ki prokram bad ki jingïaleh bapher bapher, kynthup ïa ka jingpynher kot kudi, ka jingpynmareh kulai bad kiwei pat ki prokram.
U Bah H.Kharkongor, Superintendent of Police West Khasi Hills District, u la kynmaw ïa ki jingeh kiba ka District ka la ïakynduh ha ki snem kiba la leit, khamtam ha ka por ba ki kynhun kaikhlaw kiba dang jur bha hapoh ka thaiñ, kaba long kawei na ki jingeh bakhraw kiba ktah ïa ka jingsuk bad ka roi ka par. U la ong ba ka District ka la lah ban ïaid lyngba bun na kine ki jingeh bad ka la kiew shaphrang ban long ka District kaba kham shngaiñ.
U la pynpaw pat ïa ki jingeh kiba mih thymmai, khamtam ka jingpyndonkam drok bad u la kyntu ïa baroh ki bynta jong ka imlang sahlang, ban ïatreilang ban pynneh ïa ka jingsuk bad ka jingïada ha ka District. U la kyntu ïa ki paidbah, ki tnad sorkar bad kiwei ki bynta kiba don bynta ban ïatreilang na ka bynta ka bha ka miat bad ka jingkiew shaphrang jong ka West Khasi Hills.
U Bah V.Swer MCS, ADC, u la kren shaphang ka histori jong ka West Khasi Hills District, da kaba kynmaw ïa ka jingpynmih ïa ka District ha ka 28 tarik Risaw 1976. U la pynpaw ïa ka jingdonkam jong kane ka tarik ha ka histori jong ka District, kaba long kawei na ki District kiba la rim tam ha ka Jylla Meghalaya.
Kawei na ki bynta ba kongsan jong ka prokram plie paidbah ka long ka jingpynmih paidbah ïa ka Dak jong ka Jubilee Ksiar bad ka Jingrwai Pdeng jong ka Jubilee Ksiar, kaba la thaw da u Bah Josephas Thongni. Ka jingrwai pdeng la pyni paidbah ruh kum shibynta jong ka jingplie paidbah ïa ka jingrakhe.
La buh dak ïa ka jingplie paidbah ïa ka Jubilee Ksiar da kaba ot ïa ka ribon, bud sa da ka jingïashondurlang jong ki riew don burom bad ki ophisar kiba la ïadon bynta ha kane ka prokram.
Ban pynshongshit ïa ka jingrakhe, la sdang ruh ïa ka ïalehkai Futsal bad jingïalehkai Basketball jong ki tnad sorkar, ha kaba ki ophisar bad ki nongtrei na ki tnad bapher bapher ki la ïashimbynta, kaba la wanrah ïa ka mynsiem jong ka jingïashimbynta, jingïatylli bad jingïatreilang.
Kane ka jingplie paidbah ka la buh dak ïa ka jingsdang jong ka jingrakhe Jubilee Ksiar jong ka West Khasi Hills District, kaba kynmaw burom ïa ka jingïaid lynti kaba 50 snem, ki jingjop bad ka jingkiew shaphrang jong ka District, kaba phai ruh sha ka bynta thymmai jong ka roi ka par bad ka jingkiew shaphrang jong ka West Khasi Hills.
