Shillong, Nailur 25: U Myntri ka Sorkar bad MLA ka Amlarem u Bah Lahkmen Rymbui hynne ka Sngi Thohdieng ula kyntait ia ka jingdawa shuki hadien ba la dep pyniasoh ki 8 ngut ki MLA ka UDP sha ka seng BJP bad ula ong ba ki ishu jong ka jaidbynriew ki wan hakhmat eh ban ia ka shuki.
Ki 8 ngut ki MLA hadien ba kila dep ban aiti ia ka shithi ia ka jingleit pyniasoh sha u Lamphang, kila shah pdiang burom ha u President ka BJP Meghalaya u
Rikman G Momin bad u Legislature Party Leader ka BJP bad Myntri Sorkar u Bah Sanbor Shullai ha ka ophis treikam jong ka BJP.
Haba jubab halor ka jingkylli, la ka don kano kano ka jingdawa shuki myntri ha katei ka jingiakut, u Bah Lahkmen Rymbui ula ong, “Kane ka jingdawa ia ka shuki, la ka don ne kam don, kadei kaba nga ngam don jingtip eiei, ki nongialam kiba hakhliehduh ki lah ban tip, ngam lah ban ong eiei”.
Ula ong, ba ka jingthmu ka jongki kam dei satia halor ka shuki. “Kaei kaba ngi lah buh hakhmat eh, ka long ba ka shuki kam lah ban iapeiñ bad ki mat jingdawa jong ka jaidbynriew. Ngi hap ban pyrkhat ia katei, kam long kaba suk, ngi hap ban peit ia kaei kaba ngi lah buh hakhmat eh” la bynrap u Bah Rymbui.
U Bah Rymbui ula ong, ba ka kynhun kala mih da kaba suk na ka UDP da ka jingthmu kaba shai kdar ban shimkhia ia ki jingangnud jong ki paitdbah ka jylla.
“Ngi lah mih na ka seng da ka mynsiem kaba suk, khlem kano kano ka jingkhohnioh, namar kumba nga lah ong, kaei kaba ngi kum ki nongialam ngi donkam, ngi donkam ia ka jingiada, ngi donkam ia ka roi ka par” ula ong.
Ula ong ba katei ka kynhun kala pynpaw hakhmat ki nongialam ha Delhi halor ki mat kiba kongsan kiba kynthup ia ka FCRA, ban pynrung ia ka ktien Khasi bad Garo ha ka Eighth Schedule, ILP, jingpynkylla ia ki kyndon ka MRSSA, ban pynkynriah ia kiba sah be-ain ha Them Metor, ban pynjynsur ia ki kyndon ban tih dewiong bad ka jingai kyrdan ‘Minority Status’ ia ki niam tynrai kum ka Niam Khasi bad Niam Tre.
“Ngi lah kren da kaba shai kdar hakhmat ki nongialam kiba hakhlieh halor ka jingangnud jong ki paitbah ki jong ngi bad jong ki nongshong shnong” ula ong.
Halor ka jingai jingkular, u Bah Rymbui ula ong, ba kila ioh ia ki jingkular kiba biang.
“Nga lah kren ia kitei ki mat ha ka ktien Khasi bad Phareng hakhmat jong ki nongialam kiba hakhlieh bad kila ai ia ka jubab kaba biang halor kitei ki mat baroh. Ngam lah ban batai bniah halor katei, namar kam shim la mih na ka shyntur jong nga, hynrei kala mih hi na ka shyntur jong ki nongialam kiba hakhlieh, Ngi dei ki briew kiba don ia ka rukom pyrkhat pyrdain kaba don jingkyrmen, kumta to ngin ia long lang kiba don jingkyrmen” ula ong.
