Shillong, Nailur 25 : Ka Mawlai SC kala pynsep ei ia ka kabu ksiar ba kan kiew biang ha ka kyrdan ba nyngkong ha ka miej khein point ka Shillong Premier League da ka jingiakhaid biang da 0-0 kol pyrshah ia ka Nangkiew Irat hynne ka janmiet sngi Thohdieng ha madan SSA, Polo.
Kila don tang hynriew tylli ki jingiakhun ba kut ha ka jingiakhaid na ki 32 tylli ki jingialehkai ka SPL-2026 bad ka Mawlai SC kala don bynta haduh lai tylli na ki, ia kaba baroh kila kut ha ka jingbym iathep kol. Katba ki artylli kiwei pat ki long pyrshah ia ka Langsning bad ka Shillong Lajong.
Kane ka result ka mut ba ka Mawlai kan iai neh haka kyrdan ba lai da 12 point na ki hynriew tylli ki jingiakhun. Ka Lajong ka ialam da 14 point na ki 7 tylli ki jingiakhun bad ka defending champion Langsning kala wan ba-ar da 13 point na ki 6 tylli ki jingiakhun.
Ka Nangkiew Irat kala kiew ha ka kyrdan ba 7 mynta da 8 point. Kala ialehkai haduh phra tylli ki jingialehkai haba nujor bad kiwei pat ki kynhun.
Ka Mawlai SC haduh ba kut ka jingiakhun ba hynne ka sngi ka long ka kynhun ba khlem pat shah rem wat tang shisien ruh bad ba kan shah thep ruh tang shi kol.
Haba phai sha ka jingiakhun ka long kaba ia biang bor bad itynnad bha, namar ki rang ialehkai jong baroh ar kynhun, ki la ieng iakhun tyngeh bha naduh kaba sdang haduh kaba kut, katno tam lei lei ia ki rang ap kol jong baroh ar, katta u Lambhamiki Lamare ka Mawlai bad u Surjay Kumar Pariyar ka Nangkiew, kiba na ka por sha ka por, ki la long kiba peitngor, bad phikir kum shi bynta ban nym ailad ban khih ka jar.
Ki kabu ksiar kiba la kham paw na kane ka jingiakhun kadei na u Basuklang Bina ka Mawlai, hadien ba ka bol ba u la ioh ba un khyrwit dain ka la dei beit ia ka dieng kol.
Haba wan ban bteng ia ka kylla miet, ki khyndiat ngut ki paid nongwan peitkai ki shem bad iohi ia ka jingiakhun ba shyrkhei bha ha madan, kaba ha kiba kham bun hi ki khep, kam lah ban khlem da pynrah kti rah kjat ia ki, katno tam lei lei haba ki bol ba la khyrwit sha ki arliang jong ka kol, ki la shu lait salit ban pynkhih ia ka jar.
Ha kane ka kynti jong ka jingiakhun, ka buit ialehkai ka Mawlai ka long ban pynsted bad ban ia pashat kham hajan ia ka bol hapdeng para ma ki, hynrei ka jingeh kaba la mih paw ia kane ka kynhun ka dei ha kaba kut ne ki final touch, kaba bunsien kim shim la lah ban urlong sha ka thong kumba ki thmu.
Ha kaba kut jong ka jingiakhun, la shem bad iohi ba kiba bun na ki rang ialehkai ki ar kynhun ki la kyllon beit hi kram ha madan na ka daw ka jingbynnud bym lah ban wanphai ryngkat bad ka jingjop.
Lashai ka sngi ka Langsning FC ka don ha ka ia ka kabu ba kan kiew halor duh ka miej iakhein point hadien ba kan mih madan ban iakhun pyrshah ia ka Mylliem kaban long ha ka por 3 baje nohphai sngi.
