Shillong, Nailur 24: Ka Federation of Khasi Jaiñtia bad Garo People (FKJGP) ka pynpaw ka jingpyrshah ïa ka rai jong ka tnat Ministry of Finance ba ki nongtrei jong ki Bank kin hap leit trei ha ka 27 tarik Nailur 2026, kaba dei ka Sngi U Blei.
Lah ban kdew ba ki Seng jong ki bank bapher bapher kin iakhih naduh ka 28 tarik haduh ka 30 tarik u Nailur ban dawa ia bun ki mat bad dei namar kane Sorkar Pdeng ka pynbor iaki nongtrei nank ba kin hap leit trei ha katei ka sngi.
Ka FKJGP lyngba u General Secretary Bah Eldie Newton Lyngdoh ka pynpaw ka Meghalaya ka dei ka jylla kaba bun ki paid Khristan bad ka don palat 75 percent ki riewngeit Khristan hapoh ka Jylla.
“Ka Sngi U Trai kam dei tang ka sngi shuti kaba man ka taiew hynrei iaki paid Khristan ka dei ka sngi kaba kyntang kaba la buh kyrpang da U Blei,” ong u Bah Eldie haba bynrap “Ka dei ka sngi ba ki longïing ki leit sha ki jingïaseng ban mane Blei, ban duwai,”.
Ka FKJGP la buh jingkylli hato ka Ministry ka tip ba ka jingpynbor ban trei ha ka Sngi U Trai ha ka ri ba bun paid ki Khristan ka long kum ka jingbym sngewthuh ia ki hok niam ba la pynskhem da ka Riti Synshar.
Ka pynpaw iaka jingsngew bitar ba ka hukum la pynmih jubor na Delhi khlem da don kano kano ka jingïasyllok bad ka Sorkar Jylla, ki kynhun balang ne ki nongtrei.
“Ka FKJGP ka kyntu ia ka Ministry of Finance bad ka Reserve Bank of India bad ka Sorkar Meghalaya ba kin bishar bniah mardor ia ka jinglah ban pyntreikam ia kane ka hukum ha kane ka jylla Meghalaya bad thaw da ki lad ki lynti kiba burom ia ka jingrakhe ia ka Sngi U Blei” la ong ka FKJGP.
Ha kajuh ka por ka FKJGP ka kyntu iaki MLA ka BJP ba kin shimkhia mardor halor kane ka hukum.
Kaa maham ba lada ym weng noh ia katei ka hukum, ka seng kan hap ban shim ia ki sienjam kiba tyngeh ban khanglad ia ki bank ban treikam ha katei ka sngi.
 ka pynpaw ka jingpyrshah ïa ka rai jong ka tnat Ministry of Finance ba ki nongtrei jong ki Bank kin hap leit trei ha ka 27 tarik Nailur 2026, kaba dei ka Sngi U Blei.){kind=link}