Kular ka BJP ban shimkhia ia ka Ktien Khasi, MRSSA, Dewiong bad Harijan Colony
Shillong, Nailur 23 : U Myntri Sorkar Bah Lahkmen Rymbui ha ka sngi Balang ula ong ba ka rai jong ki phra ngut ki MLA ka United Democratic Party (UDP) ban iasoh sha ka Bharatiya Janata Party (BJP) kam dei satia kaba jia syndet syndet hynrei kaba la urlong hadien ka jingiakren halor ki ishu bapher bapher kiba ktah ia ka Jylla.
U Bah Lahkmen ula pynpaw ia kane ha ka jingleit iasoh sha ka BJP ha New Delhi hynne ka sngi Balang bad ong ba ki ishu kiba pynlong ia ki MLA ban iasoh BJP ki kynthup ia ka jingpynrung ia ka ktien Khasi ha ka Khyrnit ba Phra ka Riti Synshar, ka amendment jong ka MRSSA, ban pynjynsur ia ka kam tih dewiong bad pynkynriah ia ka Them Metor na Them Iew Mawlong.
Ia kine ki 8 ngut ki MLA ka UDP la pdiang da ki nongialam ba rangbah ka BJP kynthup u Myntri ka Sorkar Pdeng Kiren Rijiju bad u nongaiktien ka BJP ba khmih ia ka North East Sambit Patra.
Haba kren ha ka jingialang iasoh, u Bah Lahkmen ula ai khublei ia u Myntri Rangbah Duh Narendra Modi bad ong ba ka ri kala sakhi ia ki jingkylla kiba khraw hapoh ka jingialam jong u.
“Mynta ka dei ka sngi kaba kongsan ia ngi baroh, khamtam na ka bynta ki 8 ngut ki MLA kiba iasoh sha ka BJP. Nga da sngewnguh shikatdei eh ia u Myntri Rangbah Duh ka ri. Hapoh ka jingialam jong u, ngi la iohi ia ki jingkylla jong ka Ri” ong u Bah Lahkmen.
U ong ba kane ka sienjam ka dei kaba la don hapdeng ka jingiakren ia katto katne por bad la pyniasnoh ia ka bad ka jing angnud jong ki MLA bad ruh ki ishu kiba donkam ia ka jingkyrshan na ka Sorkar Pdeng,
“Kane kam dei kaba shu jia syndet syndet. Ka jingiakren kala iaid la katto katne por” ula ong haa bynrap ba katto katne ki MLA ba dang kham khynnah ki kwah ban noh synniang sha ka imlang sahlang bad leh eiei halor ki ishu kiba ktah ia ka Jylla Meghalaya.
U Bah Lahkmen ula pyntip ia 4 tylli ki ishu kiba kongsan bala iakren bad ki nongialam ka BJP ha Delhi-ka jingpynrung ia ka ktien Khasi bad Garo ha ka Khyrnit ba Phra ka Riti Synshar ka Ri, ka amendment jong ka Meghalaya Residents Safety and Security Act (MRSSA), pynsuk ia ki lynti treikam ba iadei bad ka kam tih dewiong ha Meghalaya bad ka jingpynkynriah ia ka Them Metor na Them Iew Mawlong.
U pyntip ba ki nongialam ka BJP kila ai ia ka jubab kaba sngewtynnad halor kine ki jingsngewkhia ba pynsngew da ki MLA ka UDP.
“Baroh kine ki ishu, bad kiwei ki ishu ruh, ki nongialam ka BJP kila ai ia ka jubab ba sngewtynnad, kaba kin sa leh noh ha kine ki khyndiat por ban wan. Ta ka daw ngi la wan hangne ban iasoh sha ka party” ong u Bah Lahkmen.
