Shillong, Nailur 23 : Ki phra ngut ki MLA ka United Democratic Party (UDP) kila leit pyniasoh sha ka Bharatiya Janata Party (BJP) ha ka jingialang ba pynlong hynne ka sngi Balang hapoh ka headquarter ka BJP ha New Delhi.
Da kane ka jingpyniasoh, ka BJP kala kiew mynta ha ka jingdon ki MLA na ka 2 ngut sha ka 10 ngut hapoh Meghalaya.
Ia kine ki MLA ka UDP la pdiang da u Myntri ka Sorkar Pdeng Kiren Rijiju ha ka jingiadonlang u Nongaiktien ka BJP bad khmih ia ka North East Sambit Patra bad kiwei kiwei ki nongialam ka party.
Ki phra ngut ki MLA ki kynthup ia u Bah Lahkmen Rymbui, Kyrmen Shylla, Balajied Kupar Synrem, Synshar Kupar Roy Lyngdoh Thabah, Pius Marwein, Mayralborn Syiem, Ollan Sing Suin bad Matthew Beyondstar Kurbah.
Haba pdiang ia ki, u Rijiju ula ong ba ki MLA kila rai ban iasoh sha ka BJP hadien ba ki sngewtynnad ia kaei kaba u batai kum ka jingkylla jong ka thain Shatei Lam Mihngi hapoh u Myntri Rangbah Duh Narendra Modi bad ka Sorkar NDA ba ialam da ka BJP.
“Naduh ka mynsiem ngi pdiang sngewbha ia baroh ki paralok, ki phra ngut ki dkhot ka Iingdorbar Thaw Ain, ki MLA ka Meghalaya sha ka longiing ka BJP” ongu Rijiju.
Ula ong ba ka jingpynleit jingmut jong u Modi bad ka thain Shatei Lam Mihngi bad ka jingphaikhmat ka Sorkar Pdeng sha ka roi ka par kala pynkylla ia ka sain pyrthei ha ka thain. U Rijiju ula pyniapher ia ka rukom treikam ka BJP bad ka Sorkar Congress bala leit noh, haba kynnoh ba ka thain Shatei Lam Mihngi baroh shikatta kala shah khein kum ka bym don jingmut ha ka sain pyrthei namar ka jingduna ki nongmihkhmat ha Parliament.
“U Myntri Rangbah Duh Modi um ju khein ia u nombor, u Myntri Rangbah Duh ula piam ia ka thain Shatei Lam Mihngi ha ka dohnud jong u” ong u Rijiju haba bynrap ba u Modi ula leit iuhkjay palat 80 sien kum u Myntri Rangbah Duh na ka bynta ki prokram kam pynroi ha ka thain lait noh ki jingleit ialap elekshon.
U Rijiju ula ong ba ka jingwan rung ki phra ngut ki MLA kan nang pynkhlain ia ka Sorkar ba ialam u Conrad K Sangma bad nang pynkhlain ia ka jingiatreilang hapdeng ki paralok NDA ha Meghalaya.
Kane ka jingleit kynthih seng ki phra ngut ki MLA, kala khate ia ka jingdon MLA ka UDP na ka 12 ngut sha ka 4 ngut bad pynlong ia ka BJP kum ka party kaba wan ba-ar ha ka jingdon bun ki MLA hapoh ka Iingdorbar Thaw Ain hadien ka National People’s Party (NPP) u Myntri Rangbah Conrad K Sangma, kaba don 33 ngut ki MLA.
