Senapati, Nailur 16: Katto katne tylli ki ïing jong ki nongrep ki la shah wiang ding kaba la jia ha ka shimiet ha ka shnong Chawangkining kaba don ha shi lynter ka surok Imphal-Tamenglong (IT) ha ka thain khappud Kangpokpi-Senapati, iathuh ki tyllong khubor.
Kane ka jingjia ka la jia ha ka miet jong ka sngi Ba-ar, ha kaba ka ding ka la bam duh ia ki iing sah, ki mar bam bad kiwei kiwei ki tiar iing, la iathuh ki nongshong shnong bad ki tyllong khubor na ka thain.
Ki nongshong shnong ki la kynnoh ba ki kaikhlaw kiba don tiar ki donkti ha katei ka jingshah thombor.Ki la ong ba ki Naga village guards ki la iakyn tyngkhuh ia ki nong thombor kiba la suba, ha kaba arngut kiba la suba ba ki dei ki lehnoh ki la mynsaw jur.
Ki bor pahara jong ka sorkar pdeng ki la poi sha katei ka shnong ha ka por mynstep jong ka sngi Balang bad ki la iarap ia ki nongshong shnong ban tehlakam ia ka ding, la iathuh ki tyllong khubor.
Ia mynta ki dang ap ia ka jingpynbna ba thikna na ki bor pyniaid.
Kane ka jingjia ka la jia hadien katto katne kynta hadien ba arngut ki kynthei ki la shah siat iap ha ka thain Tamenglong kaba don marjan.Katkum ka jingiathuh jong ki pulit, ka Chonga Sitlhou, 60 snem ka rta bad ka Kimboi Singson, 30 snem ka rta, ki la iap ha ka janmiet jong ka sngi Ba-ar, ha ka por ba ki dang trei ha ki lyngkha rep jong ki ha ka Shnong Leisang Kuki, kaba la ju tip ruh kum ka Leisangphai.
Ki pulit ki la pynlong ia ka jingtohkit halor kitei ki jingshah pyniap.
Naduh katei ka por la pynjur ïa ki bor pahara ha shilynter ka surok Kangpokpi-Senapati-Tamenglong hapdeng ka jingjur ka jingkulmar.Ki bor pyniaid ki la kyrpad ia ki nongshong shnong ban pynneh ia ka shong suk shong sain bad ban the lakam ia lade.
