Shillong, Nailur 16 : U MLA ka Khliehriat Bah Kyrmen Shylla ha ka sngi Balang ula pynbna ba 8 ngut ki MLA ka UDP kin sa leit iasoh sha ka Bharatiya Janata Party (BJP) hadien ka jingioh pdiang ia ka jingkular kaba shai na ki nongialam na Delhi ba kin pyntreikam ia ki saw tylli ki mat jingdawa ka Jylla hashuwa ka elekshon MLA 2028.
Haba kren ha ka jingialang paidbah ha Byndihati, u Bah Kyrmen ula ong ba kane ka rai kala mih hadien ki jingialang bad u Myntri kam Pohiing Amit Shah lem bad u Myntri Rangbah ka Assam Himanta Biswa Sarma. Ula pyntip ba wat ia u Kpa jong u la pyntip ha ka sngi jong ka jingialang paidbah, namar ka jingiakren ka long kaba jwat bad ka bym pat thikna.
U Bah Shylla ula ong ba ka kynhun kala pyntip sha ki nongialam ka BJP ba 8 ngut ki MLA ka UDP kila pynthikna ban iasoh, bad une u nombor u lah ruh ban kiew sha ka khyndai, ka ban pynbun ia ka jingdon MLA ka BJP n aka 2 sha ka 10 ngut.
Ula ong ba u Amit Shah ula kwah ban pyndep noh ia kane ka jingiasoh ha kine ki saw haduh san sngi duh, hynrei ki MLA kila pynbor ban ai shuwa ia ka jingkular kaba thikna.
U MLA ka Khliehriat ula iathuh ba ula maham ia ka BJP ba lada ka shet kylla ia ki halor ki jingkular ba ka ai, ki lah ban mih noh ha ka sngi kaba bud hi, ka ban lam sha ka jinghap khmih bniah da ka BJP.
“Lada phi, ka BJP, phi shet kylla ia ngi halor ki jingkular ba phi la ai, ngi lah ban mih noh ha ka sngi kaba bud hi- ta ka daw kala shim por ia ki ban khmih bniah ia kane ka kam” ong u Bah Kyrmen.
U iathuh ba ka BJP kala kular mynta ba naduh ka sngi ba ngi pyniasoh, kan sa thaw ia ka Committee bad sdang pynkhreh ia ki kot ki sla ban pynkhreh ia ki jingdawa kawei hadien kawei.
Kat kum ka jingong u bah Kyrmen, ka BJP kala ai ia ka jingkular kaba shai ba kan pynbeit ia ka jingeh ba mih na ka kam tih dewiong, kyntur ban pynrung noh ia ka ktien Khasi ha ka Khyrnit ba Phra ka Riti Synshar ka Ri, pyntreikam ia ka Meghalaya Residents Safety and Security Act bad pynkynriah ia ka Harijan Colony na Them Iew Mawlong hashuwa ka elekshon 2028.
U iathuh ba kane ka jingkular kala pynsngew skhem ia u ban iasoh sha ka BJP bad kam dei satia tang ka jingiashondur lang bad u Amit Shah hynrei ka rai kaba la shim da ka jingkitkhlieh na ka bynta ka jingim jong ki paidbah ka Khliehriat.
“Kine ki dei ki mat kiba kila ai ia ka jingkular kaba shai ba kin pynurlong shuwa ka elekshon MLA 2028. Kane ka dei ka daw ba kala pynsngew skhem ia nga ban iasoh sha ka BJP” ula ong.
Haba pynshai ba kane ka sienjam kam dei kaba la leh namar ka jingbitar pyrshah iaka UDP, u Bah Kyrmen ula ong ba kam don satia kano kano ka jingsngew pyrshah ne jingbuhkhoh pyrshah ia u Bah Metbah Lyngdoh lane ia ka party kaba la kyrshan ia u.
Une u MLA ka Khliehriat ula kyntait ruh ba kan don ka jingiapher jingmut bad u Myntri Rangbah Conrad K Sangma.
“Wat pyrkhat ba ka jingiapher jingmut hapdeng jong nga bad u Myntri Rangbah Conrad K Sangma lane bad ki Myntri Sorkar ne MLA. Ngi la iatreilang kum kawei ka longiing” ula ong.
