Shillong, Nailur 15: U President ka BJP Meghalaya Rikman G Momin ha ka sngi Baar ula ong, ba ki nongialam kiba ha khliehduh jong ka seng kmie kin sa shim ia ka rai ha kaba iadei bad ka jingpynieng kyrtong na ka bynta ka elekshon shiteng samoi jong ka MP Lok Sabha na Shillong Constituency bad halor ka jingthmu ki 8 ngut ki MLA ka UDP ban pyniasoh bad ka BJP.
U Momin ula ong ba ka BJP Meghalaya kala dep ban phah ia ka kyrteng jong kito kiba don jingthmu ban iakhun ia ka elekshon na ka Shillong Constituency sha ki nongialam kiba ha khliehduh jong ka seng kmie.
“Ia katei yn sa rai da ki nongialam ka seng kmie. Ki kyrteng ki lah don. Ngi don baroh 9 tylli ki kyrteng. Ngi lah dep ban khot ia ka aplikeshon bad ngi lah dep ban aiti ia katei ka sha ka seng kmie. Ka seng kmie kan sa shim ia ka rai” ula ong.
U President ka BJP Meghalaya ula ong, ba kam shim la don kano kano ka jingpyntip na ka seng kmie ha kaba iadei bad ka jingthmu ki MLA ka UDP ban pyniasoh noh bad ka seng.
“Em, ngim pat pynbeit eiei ia katei. Ngim don jingtip la ki lah kloi ne em ban pyniasoh noh. Ki lah ban dang don hapdeng ka jingiakren bad ki nongialam jong ka seng kmie. Kumta ia mynta hi, ngim shim la ioh ia kino kino ki jingtip na ka seng kmie” ong u Momin.
Ula kyntait ruh ia ki jingkynnoh ba ki nongialam ha ka jylla kila shah leh kiar ha kaba iadei bad katei ka bynta.
“Em ki nongialam ka jylla kim shim la shah leh kiar. Mao ba ong ba ki nongialam ka jylla kila shah leh kiar? Ki don katto katne ki bynta kiba dei ban leh hi da ka seng kmie” ula bynrap.
