Imphal, Nailur 14: Ka Kuki-Zo Council (KZC) ka la pynrem jur ia ka jingshah pyniap jong ki saw ngut ki riew paidbah jong ka Kuki-Zo, ba kynthup ia arngut ki kynthei, ha ki jinghiar thma ha ki shnong L. Tollen bad Longpi ha Manipur, Tamenglong bad Noney distrik ha ka 13tarik Nailur.
Ha ka kyrwoh ba la pynmih ha ka sngi Nyngkong, ka KZC ka la kynnoh ba ka jingthombor ka dei kiba la leh da ki kynhun lehnoh Naga bad ong ba ka jingshah thombor pyrshah ïa ki riew paidbah jong ka jaitbynriew Kuki-Zo ka dang ïai bteng.
Ha ka shnong L. Tollen, ka Council ka la ong ba u Seineh Singsit bad ka lok jong u ka Lhingzangai Singsit ki la iap, katba u khun jong ki uba dang 6 snem ka rta u la mynsaw jur na ka jingshah siat na ka kti.
Ha ka shnong Longpi, ka Julie Gangte, kaba armet, bad ka Thangvel Roel Gangte, ki la iap, katba ka Nei Esther, ka la mynsaw jur, ong ka kyrwoh.
Ka KZC ka la kynnoh ïa ki nongïalam saiñ hima sima bad ki seng bhalang jong ki Naga ba ki pynneh ïa ka “double standard” da kaba dawa ïa ka hok halor ka jingïap jong ki hynriew ngut ki Naga katba katkum ka jingong jong ka Council, ki sngap jar halor ka jingshah pynïap jong ki 22 ngut ki riew paidbah Kuki-Zo naduh ba sdang jong u snem 2026.
Ka Council ka la kynnoh ba ki kynthei bad ki khynnah ruh ki dei napdeng kiba la shah pyniap ha katei ka por.
Ka la kynthoh ruh ïa kaei kaba ka la batai kum ka jingbym mon jong ki nongïalam saiñ hima sima bad ki nongïalam sengbhalang jong ki Naga ban bud ïa ka jingïapynbeit bad jingïakren kaba don jingmut ban pynkut noh ïa ka jingïakynad hapdeng ki jaitbynriew Naga bad Kuki-Zo.
Shuh shuh ka KZC ka la pynpaw ïa ka jingsngewkhia halor ki khubor kiba pynshong nongrim ïa ki jingshah thombor ba khatduh ha ki lehnoh NSCN-IM kiba la kynnoh ba ki la treikam lang ha ryngkat bad ki nongap pahara shnong jong ka ZUF-K bad ki Naga.
Ka la kyntu ia ka sorkar India ba kan tuklar bad ong ba ym dei ban ailad ia ki kynhun kieng atiar ba kin treikam khlem jingshah pynshitom ha Manipur.
Ka Council ka la maham ba ka jingbteng ban pyndonkam da ki tiar ialeh ka lah ban buh ia ki riew paidbah ha ka jingma bad pynlong ia ka jylla ban leit sha kawei pat ka jingialeh kaba jur.
“Ki jaitbynriew Kuki-Zo ki la shah ia ka jingia umsnam snam kaba biang.Ka hok ka dei ban long kaba iaryngkat, ka jingkitkhlieh kaba iadei bad baroh, bad ia ka jingim jong ki riew paidbah khlem da leh shiliang khmat,” la ong ka kyrwoh.
