Shillong, Nailur 14: Ka tnat Directorate of Health Services (DHS) kan pynmih thymmai lashai ka sngi ia ka thup bhah pule MBBS bad BDS u snem 2026-27 hadien ba weng noh ia ka thup bala pynmih kham hashwa da ka jingujorpyrshah ka Jaintia Students’ Union (JSU) kaa la kynnoh ba don ka jingpynkhein ia ka rukom sam bhah bhah pule.
Ka Director ka tnat ka Koit ka Khiah, Dr L Mylliem Umlong ka la kular ia kane hadien ka jingïakynduh bad ka JSU ha ka sngi Nyngkong, hadien ba ka seng ka la kdew ïa ki jingbym bud ryntih iaka bhah pule Doctor katkum ka jingpynbna No. DHSMER.150/MBBS Admission/2026-27/5607.
Ia ka kynhun ka JSU la ialam da u Education Secretary Bah Bocheru Mi Pohsnem ryngkat u assistant secretary u bah Pysnhailang Suliang, executive member u Bah Borntifulson Rupon bad u Bah Jefferson Shylla.
Ka JSU ka la kynnoh ba ka tnat ka koit ka khiah ka ai bhah pule (seat) ha ki jaka pule kum ka NEIGRIHMS sha ki kyrtong kiba kham duna marks ha ka eksamin NEET katba kala kyntait pat iaki kyrtong kiba kham heh marks kiba kwah pule ha kane ka juh ka jaka pule.
“Kum ka nuksa, uwei u kyrtong serial no. 30 uba ioh 439 marks u la ioh bhah ban pule ha NEIGRIHMS, hynrei katto katne ngut ki kyrtong kiba kham heh marks kiba la jied ia ka NEIGRIHMS kim shym la ioh bhah pule. Kane ka dei ka jingpynkheinia ka bhah pule katkum ka jinglah jong ki (merit)” la ong ka JSU.
Ka JSU ka la kynnoh ruh halor ka jingbym pyllait paidbah ïa ka Standard Operating Procedure. Ka la ong ba watla ka la ai jingmut ha u snem ba la dep bad buddien lyngba ka email, hynrei ia ka SOP ba la pynthymmai ba la kular da ka tnat ym shym la pyllait paidbah.
“Ki heh Sorkar ki la kam ba ïa ka jingai bhah la pynlong katkum ka SOP ba dang mynjur thymmai kaba ym shym la pyntip sha ki paidbah. Ki la khlem iaid katkum ka rukom pyntreikam kaba shai kaba la buh ha u bnai Nailur 2025,” ong ka JSU.
Mynta ka tnat ka koit ka khiah ka la bthah ïa ki samla pule kiba ïakynduh ïa ka jingbym ïahap ha ka jingai bhah pule Doctor ban phah ïa ki jingujor jong ki lyngba ka email ha [email protected].
Ka jingkhang ban pdiang iaki jingujor kan plie haduh ka por 10 baje mynmiet mynta ka sngi khnang ba yn lah ban bishar ia ki jingujor katba dang pynbeit biang ia ka thup ba thymmai.
Ka JSU ka la ong ba kan dang peitngor haduh ban da pyndep ia kane ka kam ha ka rukom kaba hok bad kaba khuid.
“Ka jingdawa jong ngi ka long kaba suk, ym dei ban leh shiliang, ym dei ban ai bhah kyrpang. Ka jingai bhah ka dei ban long kaba pyrkhing bha bad kadei ban long khuid, kaba shai bad ka dei ban burom ïa ka jingjied ïa ki jaka pule ba la jied da ki samla pule bad ka dei ban bud ïa ka SOP” la bynrap ka JSU
