Shillong, Nailur 12 : U Myntri Rangbah Conrad K Sangma ula ong ba ka GHADC Land Record (Patta) Management System ba dang shu pynlait thymmai, kan pynsuk ia ki paidbah ban ioh ka jingshakri haba iadei bad ki jaka pule bad kan nang pynkhlain shuh shuh ia ka jingtreikam ka Council.
“Kane kan pynlah ia ki nongshongshnong ban aplai, siew ia ki jingsiew bad buddien ia ki aplikeshon lyngba ka kor online khlem da donkam ban leit sha ka Ophis ka Council” ong u Conrad hadien bap lie ia ka portal ha Tikrikilla.
Ula iaroh ia u CEM Dhormonath Sangma bad ia baroh ki MDC namar ka jingkyntur ban wanrah ia ki jingkylla ha ka rukom treikam ha GHADC bad ban jur ia ka jingdonkam ia ka jaka treikam kaba khlain bad ka synshar khadar ba iaid da ka technology.
Ka portal patta la pynlait ha ryngkat ka Service, Conduct bad Disciplinary Rules ba nyngkong eh jong ka council ha kine ki 70 snem.
Kane ka rukom treikam thymmai ka ai ka jinshakri ban leh online ia ki patta ka ban long ka sien ba nyngkong eh ha baroh san tylli ki district ka ri-lum Garo, ka ban long da ka ktien Garo bad English.
Ki nongshongshnong ki lah ban aplai ia ki patta thymmai, pynthymmai lane pynkylla, siew online bad buddien ia ka jingiaid ki kam lyngba u unique reference number. Baroh ki patta kin don ia u QR code bad jingsoi kyrteng digital ban pynshsha, da ka jingthmu ban tehlakam ia ki jingleh thok.
Halor ka service rules, ka GHADC ha ka sien ba nyngkong eh kan iaid kat kum ka ain ha ka jingthung kam, jingkyntiew kyrdan bad ka rukom long ka jingshakri ha baroh ki 16 tylli ki tnad nalor ka Conduct and Discipline & Appeal Rules. Ban pyntreikam ia kane ka ain, lah ai jinghikai ia 43 ngut ki nongtrei lyngba ka MATI, Shillong bad 60 ngut ha Tura.
U Myntri Rangbah ula niew ruh ia ka rai ban leh la ka jong ka Electoral Roll (Separate Electoral Roll) kum ka sienjam ban sah khana pateng la pateng ha kaban pynbeit ia ki jingeh kiba la sahteng la slem bha.
“Ka rai kam dei kaba long pyrshah ia kino kino ki jaidbynriew, hynrei ka thmu ban ai ka jingshai bad iada ia ka bha ka miat ki jaidbynriew riewlum” ong u Conrad haba ban jur ia ka jingsuk bad ka jingia imsuk imsain lang hapdeeng ki riewlum bad ki bar jylla.
Kat kum ka jingong u Deputy Commissioner ka West Garo Hills, kin da don shuh shuh ki jingpynkylla ban wanrah ia ka jingtreikam da ki kor digital kynthup ka portal na ka bynta ka professional tax bad ka trading bu non-tribal licence.
