Ka Sorkar u Conrad ka pynbeit ia ki kynrum kynram ba da ki phew snem
Shillong,Nailur 12 : Ki nonghikai SSA ha Meghalaya kila ther pyrshah ia ka jingdawa ka Voice of the People Party (VPP) ban weng ia u Vijay Kumar Mantri kum u Commissioner & Secretary ka Tnad Education.
U President ka MSSASA Aristotle C Rymbai ha ka sngi Saitjain ula ong ba ka jingkren jong u President ka VPP Ardent Basaiawmoit kala pynkyndit bad ka bym iahap satia.
“Ngi khlem khmih lynti ia kum kane ka jingkren na u Ardent Miller Basaiawmoit-u nongmihkhmat paidbah ba ia burom” ong u Bah Aristotle.
“Kum ka kynhun ba don bynta, ngi shem ba u Sir Vijay Kumar Mantri u dei uba trei shitom bha, uba aiti lut ha ka kam bad u briew uba kut jingmut ban wanrah ia ki jingpynkylla ha ka kam pule dangle ha Meghalaya” ula ong.
U Bah Aristotle ula ong ba u Mantri u dei u Ophisar ba lah beit ban iakynduh ki nonghikai bad uba sngap ia ki jingeh jong ki.
“U dei u briew uba sngap bad sngew ia ki jingeh bala pynpaw da ki nonghikai. Kumta, kum ka seng, ngi sngew ba ka jingdawa jong ka VPP ban weng ia u Sir Vijay Kumar Mantri ka dei ka bym iahar namar u dei uwei na ki Ophis uba la pyntreikam ia ka policy bad ka rai bala shim da ka Sorkar hadien ba pyndep ia ki kam kiba donkam ban leh”ula ong.
Haba kyrshan ia ka jingkyntur ka Sorkar ban wanrah ia ki jingkylla, u Bah Aristotle ula ong ba ki nonghikai SSA, Adhoc bad Fourth Teacher kila mad ia ka jingjynjar da ki phew snem namar ka jing bym shngain ka kam.
“La jan laiphew snem, ki nonghikai SSA, nonghikai adhoc, fourth teacher-ngi la ioh tulop da ka fix pay khlem kano kano ka jingpynthikan ia ka kam. Kane ka Sorkar hapoh ka jingialam u Myntri Rangbah Conrad K Sangma, Myntri Pule Puthi Bah Lahkmen Rymbui, Commissioner & Secretary Vijay Kumar Mantri bad baroh ki heh Ophisar ka Tnad Pule Puthi ha ka jingiasyllok bad ki nonghikai, kila wanrah ia ka policy ban pyntreikam ia ka jingsiew tulop bala pynbeit ryntih, pynthikna ia ka jingshakri la ai jingiada da ka Sorkar” ula ong.
“Ym tang katta, ka Sorkar kala wanrah ruh ia ka policy ban pyntreikam lang ia ka CPF na ka bynta kine ki nonghikai” ula bynrap.
Haba kubur ba dang donkam ban pynbeit bha ia ka SPF, u Bah Aristotle ula ong ba dei ban pynbeit ia ka lyngba ka jingiakren, ym ka jingpynlong sohpdung sain pyrthei.
