Shillong, 12 Nailur: Ka Dorbar Shnong Mawlong Nongtluh, kaba dei kawei na ki Shnong kaba la rim bha hapoh Raid Nongtluh, Ri-Bhoi District, mynta ka sngi kala pynlong ia ka prokram kyrpang ne ka jingialang paidbah hapoh ka Dorbar Hall jong ka Shnong.
Ha kane ka jingialang la wan iashim bynta da ki Longkmie Longkpa, ki samla kynthup ki nongkitkam jong ka Seng Kynthei Shnong, Seng Samla Shnong bad ka Sports Club Shnong ryngkat lang ki Dkhot ka SYADC.
Ka thong kaba hakhmat jong kane ka jingialang ka long ban iathir iatai kumno ban kyntiew ia ka kam ialehkai (Sports) bad kumno ban kyntiew ia ki khun samla hapoh ka Shnong ka thaw.
Kumta, ka Dorbar Shnong lyngba ka tnat jong ka kaba la tip kum ka Sports Youth Affairs Development Council (SYADC) ka la buh thong ban shimkhia kyrpang ia ka kam Sports.
U Rangbah Shnong bad uba long ruh u Chairman jong ka Sports Youth Affairs Development Council, u Bah Arbingstone Shylla, ula shim bynta ban ai jingkren bad pynshai bha ia ki jingthmu bad ki jingpyrshang jong kane ka Tnat thymmai.
Kiwei pat ki nongai jingkren ki kynthup ia u Tbn. D.A. Syiem uba la ialam ia ka jingduwai, Kong Estre Manih, Secretary, Seng Kynthei Shnong, u Tbn. E.J. Rynshon bad u Bah Shanbor Syiem, Secretary Dorbar Shnong.
Ha kane kajuh ka sngi, na ka liang ka Hid Foundation Shillong, ka la noh synniang da ki tiar ialehkai (Sports Items) bad ka song pisa sha ka Sports Youth Affairs Development Council jong ka Dorbar Shnong Mawlong Nongtluh, lyngba u Samla Soniland Malai, Executive Coordinator, Hid Foundation Shillong.
Kane ka jingnoh synniang ka dei ruh kum shi bynta ka jingpyrshang jong ka Hid Foundation Shillong ban kyntiew ia ki kam Sports bad ban ai mynsiem ia ki samla jong katei ka dong ka thaiñ.
