Shilllong, Nailur 11: Ki don kumba 2,604 ngut ki nongpang TB kiba dang shah sumar mynta ha Meghalaya, ha kaba 89 ngut ki Ni-kshay Mitra ki kyrshan ïa ki 328 ngut na kine.
U Lat ka jylla u CH Vijayashankar ha ka sngi Thohdieng u la sam ïa ki song jingbam (basket food) sha ki 10 ngut ki nongpang TB ha Lok Bhavan hapoh ka jingpynïaid jong u Pradhan Mantri TB Mukt Bharat Abhiyaan, da kaba pynsngew ïa ka jingsumar bad jingai mynsiem sha kito kiba don hapoh ka jingsumar.
Ha kane ka sngi la don lang u Additional Chief Secretary jong u Lat ka jylla u HC Chaudhary bad u chairman bad u managing director ka NEDFi u PVSLN Murty.
“Naduh ba la sdang ïa ka jingthmu jong ka Ni-kshay Mitra ha u snem 2022, ki don 452 ngut ki Ni-kshay Mitra kiba la wan shakhmat ha Meghalaya, ha kaba 12,897 tylli ki song jingbam ba la sam kiba ai jingmyntoi ïa ki 3,918 ngut ki briew kiba don ïa ka jingpang TB,” la ong ka khubor.
Ka NEDFi kum u Ni-kshay Mitra ka la ai ka jingkyrshan kaba neh.
U Murty u la ong ba ka NEDFi ka la trei palat 30 snem ha ki jingthmu pynroi kynthup ïa ka jingai kam ïa ki kynthei bad ka koit ka khiah, bad ka dang ïai plie ïa ki jingthmu na ka bynta ka bha ka miat.
U la ïaroh ïa ka jingpyrshang jong ka Sorkar India bad kumjuh ruh ïa ka Sorkar Meghalaya ha kaba pynbiang ïa ki lad ki lynti bad jingsumar ïa ki nongpang TB.
U Lat u la ong ba ka jingkyrshan ba neh jong ki paidbah ka long kaba kongsan bha ban ioh ïa ka Meghalaya kaba lait na ka jingpang TB bad ka India kaba lait na ka jingpang TB.
